Миллий гвардия тизимида “Билим — нурли келажак пойдевори” шиори остида ўтказилган инглиз тили викторинасининг ғолиблари аниқланди.
Ўзбекистон Республикаси Миллий гвардияси Маънавият ва маърифат марказида Миллий гвардия ҳудудий бошқармалари, ҳарбий қисмлар ва таълим муассасалари терма жамоалари ўртасида анъанавий тарзда ўтказиб келинаётган инглиз тили викторинасининг республика босқичи бўлиб ўтди.
Мазкур викторинада Ўзбекистон давлат жаҳон тиллари университети ҳамда Тошкент давлат шарқшунослик университетининг малакали профессор-ўқитувчилари ҳайъат аъзолари сифатида иштирок этиб, беллашув жараёнига холис ва профессионал баҳо бердилар. Мусобақада Ўзбекистон Республикаси Жамоат хавфсизлиги университети, Миллий гвардиянинг Қорақалпоғистон Республикаси, Бухоро, Фарғона ва Самарқанд вилоятлари шунингдек, Тошкент шаҳри бўйича бошқармалари ҳарбий хизматчиларидан ташкил топган жамоалар билан бир қаторда “Темурбеклар мактаби” ҳарбий-академик лицейи ҳамда Миллий гвардия Ҳарбий мусиқа академик лицейининг иқтидорли ўқувчиларидан иборат жамоалар ҳам муносиб иштирок этди.
Викторинада ҳар бири 6 нафардан иборат 9 та жамоа уч босқичда — “Таништирув”, “Савол-жавоб” ва “Сардорлар баҳси” шартлари асосида ўз билим ва салоҳиятини намоён этди. Иштирокчиларнинг инглиз тилини пухта эгаллагани, тарихий ва ҳуқуқий билимларга эга экани, шунингдек, мустақил фикрлаш ва нутқ маданиятининг юқори даражада эканлиги ҳайъат аъзолари томонидан алоҳида эътироф этилди.
“Таништирув” шартида жамоалар ўз ўқув муассасалари ва ҳарбий қисмлари ҳақида креатив видеороликлар, тақдимотлар ва саҳналаштирилган чиқишлар орқали маълумотлар тақдим этди. “Савол-жавоб” босқичида эса иштирокчилар Ўзбекистон тарихи, Ўзбекистон Республикаси Конституцияси ҳамда миллий маданиятга оид саволларга инглиз тилида батафсил жавоблар бердилар. “Сардорлар баҳси”да эса жамоа сардорлари эркин мавзуда тайёрлаб келган мавзуларини кенг ёритиб беришди.
Иштирокчиларнинг юқори тайёргарлиги, интеллектуал салоҳияти ва рақобатнинг кескинлиги ҳайъат аъзолари учун ғолибларни аниқлашда муайян мураккаблик туғдирди. Шу ўринда таъкидлаш жоизки, аввалги уч йил давомида инглиз тили викторинасида Ўзбекистон Республикаси Жамоат хавфсизлиги университети жамоаси кетма-кет ғолибликни қўлга киритиб келган бўлса, жорий йилда ушбу анъанани Тошкент “Темурбеклар мактаби” ҳарбий-академик лицейининг “Young Temurids” жамоаси муносиб тарзда давом эттириб, мусобақанинг мутлақ ғолибига айланди. Бу ҳолат ёшлар ўртасида соғлом рақобат, узлуксиз изланиш ва билимга интилиш тобора кучайиб бораётганидан далолат беради.
Якуний натижаларга кўра, учинчи ўрин Тошкент вилоятидан иштирок этган “Renessans” жамоасига, иккинчи ўрин эса Ўзбекистон Республикаси Жамоат хавфсизлиги университетининг “The Invincibles” жамоасига насиб этди.
Викторина якунида ғолиб ва совриндор жамоалар кубок ҳамда қимматбаҳо совғалар билан тақдирланди. Шунингдек, беллашувда фаол иштирок этган жамоалар турли номинациялар бўйича рағбатлантирилди. Жамоалар билимини баҳолашда жонбозлик кўрсатган ҳайъат аъзоларига Миллий гвардия қўмондонлигининг ташаккурномалари топширилди.
Мазкур викторина яна бир бор шуни яққол намоён этдики, Янги Ўзбекистон ёшлари — билимли, зукко, ташаббускор ва замонавий тафаккур эгаларидир. Уларнинг чуқур билимга интилиши, хорижий тилларни пухта эгаллаши ва юксак маънавиятга эга бўлиши мамлакатимиз келажаги учун мустаҳкам пойдевор бўлиб хизмат қилади.
