Milliy gvardiya qo‘mondonligi tomonidan Toshkent shahar Olmazor tumanida joylashgan 2-sonli “Muruvvat” bolalar uyi tarbiyalanuvchilari holidan xabar olinib, ular uchun konsert dasturi tashkil etildi.
Mazkur tadbir «Yoshlar va biznesni qo‘llab-quvvatlash yili» davlat dasturida belgilab berilgan vazifalarga hamohang ravishda yoshlarning taʼtildagi bo‘sh vaqtlarini mazmunli o‘tkazish, ularning iqtidorlarini namoyon etish, ayniqsa mehr va muruvvatga tashna qalb egalari – imkoniyati cheklangan bolalarni maʼnaviy va moddiy qo‘llab quvvatlash, ularning holidan xabar olish, ehtirom bildirish, ko‘nglini ko‘tarish, xursandchilik va yuqori kayfiyat shu bilan birga ularga hamisha eʼzozda ekanliklarini xis qilish tuyg‘ularini baxsh etish maqsadida o‘tkazildi.
Tadbirda Milliy gvardiya qo‘mondoni o‘rinbosari polkovnik S.Mamayusupov ishtirok etib, bolajonlarga o‘zining ezgu tilaklarini bildirdi va Milliy gvardiya harbiy libosini kiyish istagini bildirgan “Muruvvat” bolalar uyi tarbiyalanuvchilariga harbiy liboslarni ulashdi.
Tadbirda Milliy gvardiya Faxriy qorovuli, Harbiy orkestr jamoasi, Milliy gvardiya yosh harbiy xizmatchilari, Maʼnaviyat va maʼrifat markazi sanʼatkorlari ishtirok etishib, o‘z chiqishlari bilan bolajonlarga xursandchilik bag‘ishladi. Tadbirga jalb qilingan “Muruvvat” bolalar uyi tarbiyalanuvchilarining maʼnaviy ruhiy holatini ko‘tarishga qaratilgan konsert dasturi tashkil etilib, ularning maʼnaviy xordiq chiqarishlariga hissa qo‘shildi. Shuningdek, bolajonlar ham o‘zlari tayyorlagan sahna ko‘rinishlarini mehmonlarga havola etishdi. Bundan tashqari Milliy gvardiya Toshkent shahar chavandozlar maktabi tomonidan “Muruvvat” bolalar uyida yoshlar uchun mahorat darsi tashkil etilib, bolalarda ot minish ko‘nikmalarini oshirishdi. Muassasadagi sog‘lomlashtirish oyligini mazmunli o‘tkazish uchun har kuni anashunday tadbirlar o‘tkazilib kelinmoqda.
