Миллий гвардия қўмондонлиги томонидан Тошкент шаҳар Олмазор туманида жойлашган 2-сонли “Мурувват” болалар уйи тарбияланувчилари ҳолидан хабар олиниб, улар учун концерт дастури ташкил этилди.
Мазкур тадбир «Ёшлар ва бизнесни қўллаб-қувватлаш йили» давлат дастурида белгилаб берилган вазифаларга ҳамоҳанг равишда ёшларнинг таътилдаги бўш вақтларини мазмунли ўтказиш, уларнинг иқтидорларини намоён этиш, айниқса меҳр ва мурувватга ташна қалб эгалари – имконияти чекланган болаларни маънавий ва моддий қўллаб қувватлаш, уларнинг ҳолидан хабар олиш, эҳтиром билдириш, кўнглини кўтариш, хурсандчилик ва юқори кайфият шу билан бирга уларга ҳамиша эъзозда эканликларини хис қилиш туйғуларини бахш этиш мақсадида ўтказилди.
Тадбирда Миллий гвардия қўмондони ўринбосари полковник С.Мамаюсупов иштирок этиб, болажонларга ўзининг эзгу тилакларини билдирди ва Миллий гвардия ҳарбий либосини кийиш истагини билдирган “Мурувват” болалар уйи тарбияланувчиларига ҳарбий либосларни улашди.
Тадбирда Миллий гвардия Фахрий қоровули, Ҳарбий оркестр жамоаси, Миллий гвардия ёш ҳарбий хизматчилари, Маънавият ва маърифат маркази санъаткорлари иштирок этишиб, ўз чиқишлари билан болажонларга хурсандчилик бағишлади. Тадбирга жалб қилинган “Мурувват” болалар уйи тарбияланувчиларининг маънавий руҳий ҳолатини кўтаришга қаратилган концерт дастури ташкил этилиб, уларнинг маънавий хордиқ чиқаришларига ҳисса қўшилди. Шунингдек, болажонлар ҳам ўзлари тайёрлаган саҳна кўринишларини меҳмонларга ҳавола этишди. Бундан ташқари Миллий гвардия Тошкент шаҳар чавандозлар мактаби томонидан “Мурувват” болалар уйида ёшлар учун маҳорат дарси ташкил этилиб, болаларда от миниш кўникмаларини оширишди. Муассасадаги соғломлаштириш ойлигини мазмунли ўтказиш учун ҳар куни анашундай тадбирлар ўтказилиб келинмоқда.
