Milliy gvardiya Toshkent shahri bo‘yicha boshqarmasida Qurolli kuchlar tarkibiga kiruvchi vazirlik va idoralarda yaratilgan ilmiy va innovatsion ishlanmalar ko‘rgazmasi bo‘lib o‘tdi.
Mazkur Ko‘rgazmada Mudofaa, Favqulodda vaziyatlar vazirliklari hamda Milliy gvardiyaning harbiy taʼlim muassasalari professor-o‘qituvchilari, kursant va talabalari, ilmiy izlanuvchilari hamda ilmiy va innovatsion faoliyatni tashkil etish sohasida katta tajribaga ega bo‘lgan mutaxassislar, shuningdek, Milliy gvardiya Qo‘riqlash bosh boshqarmasining hududiy bo‘linma xodimlari o‘zlarining ilmiy-innovatsion va ratsionalizatorlik ishlanmalari bilan ishtirok etdilar.
Ushbu ko‘rgazmada Milliy gvardiya qo‘mondoni general-mayor R.Djurayev ishtirok etib, ko‘rgazmadan joy olgan ilmiy - innovatsion ishlanmalar bilan tanishdi. Unda Milliy gvardiya, Mudofaa va Favqulodda vaziyatlar vazirliklari tizimidagi harbiy taʼlim muassasalarida tahsil olib kelayotgan kursantlarning sohaga oid yangilik yaratishga bo‘lgan ilmiy intilishlari va salohiyatlarini munosib baholadi.
Shuningdek, O‘zbekiston Respublikasi Oliy taʼlim, fan va innovatsiyalar vazirligi mutaxassislari eʼtibori ko‘rgazma doirasida namoyish etilayotgan 70 dan ortiq konstruktorlik ilmiy-innovatsion va ratsionalizatorlik ishlanmalar hamda O‘zbekiston Respublikasi Jamoat xavfsizligi universiteti va Jizzax mintaqaviy o‘quv markazida chop etilgan 100 dan ziyod darslik va qo‘llanmalarga qaratilib kelgusida amaliyotga joriy qilish masalalari muhokama qilindi.
Ishlanmalar taqdimoti davomida ularning bugungi kunda O‘zbekiston Respublikasi Qurolli Kuchlarida va chet el armiyalarida mavjud bo‘lgan o‘xshash namunalardan farqli tomonlari, yangilik jihatlari hamda Qurolli Kuchlar uchun foydali xususiyatlari, qo‘llanish sohasi, taktik-texnik xarakteristikalari to‘g‘risida ko‘rgazma qatnashchilari va mehmonlariga batafsil maʼlumotlar berildi.
Ko‘rgazma ishtirokchilari tomonidan ilmiy-innovatsion va ratsionalizatorlik loyihalarini qo‘shinlar hamda taʼlim muassasalarining o‘quv va jangovar-xizmat faoliyatiga tatbiq etish bo‘yicha bir qator taklif va tavsiyalar bildirildi.
Tadbir so‘ngida eng yaxshi ishlanmalar mualliflari va ko‘rgazmaning faol qatnashchilari tashkilotchilar tomonidan munosib taqdirlandilar.
