MILLIY GVARDIYA XODIMLARI BAXSHILAR YURTIDA BELLASHMOQDA
Surxondaryo viloyatida baxshilar maktabida, Milliy gvardiya tizimidagi bo‘linmalar, harbiy qism va taʼlim muassasalari hamda Qo‘riqlash boshqarmalari xodimlari o‘rtasida Respublika “Baxshichilik sanʼati” ko‘rik tanlovi boshlandi. Unda Respublikamizning barcha hududlaridan ishtirokchilar qatnashishmoqda.
Aytish kerakki, o‘zbek xalq dostonlari ajdodlarimizning uzoq o‘tmishi, madaniy hayoti va milliy qadriyatlarini o‘zida mujassamlashtirgan bo‘lib, u o‘lmas, nomoddiy madaniy meros sifatida yuksak qadrlanmoqda. Baxshichilik sanʼatining serjilo ijro namunalari tinglovchiga katta zavq-shavq bag‘ishlashi bilan birga kishilarni yaxshilikka chorlovchi, maʼrifat tarqatuvchi, yosh avlod qalbida ezgu fazilatlarni uyg‘otuvchi maʼnaviy targ‘ibot manbai vazifasini o‘tab kelayotir. Milliy gvardiya tizimida ilk marotaba tashkil etilgan tadbirda ham, milliy qadriyatlarimizni asrab-avaylash, xalq dostonlarining rang-barang namunalarini keng targ‘ib etishga alohida eʼtibor qaratildi. Tanlov ikki bosqichda olib borilib, unda ishtirokchilar cholg‘u asboblarida kuy chalish hamda baxshi termalaridan aytish borasida bellashmoqdalar.
Har bir ishtirokchilarining chiqishlari O‘zbekiston xalq baxshilari, taniqli sanʼat va madaniyat arboblari tomonidan baholanib borilmoqda. Bu jarayonida dostonchilik sanʼati namoyandalarining asl milliy xususiyatlari, kuy, nag‘ma va termalarning badiiy-estetik jihatlari, o‘ziga xosligi, kiyinishi, sahna madaniyati, liboslaridagi badiiy bezaklarning milliy anʼanalarga mosligi, anʼanaviy musiqa asboblaridan foydalanish jihatlariga alohida eʼtibor qaratilmoqda.
Maʼlumot o‘rnida, baxshichilik sanʼati ko‘rik tanlovi g‘oliblari turli darajadagi diplom hamda pul mukofotlari bilan taqdirlanadi. Jumladan, tanlovning 1-o‘rin sohibi 5 000 000 so‘m, 2-o‘rin sohibi 3 000 000 so‘m, 3-o‘rin egasiga 2 000 000 so‘m miqdorida pul mukofotlari bilan rag‘batlantiriladi. Bundan tashqari “Eng yosh baxshichilik sanʼati ishtirokchisi” nominatsiyalari bo‘yicha ham g‘oliblar aniqlanib, ularga pul mukofoti va maxsus diplom bilan taqdirlanadi.
