Joriy yilning 4 aprel kuni soat 16.15 da nomaʼlum shaxs “Qoʻriqlash” bosh boshqarmasining xorijiy davlatlarning diplomatik vakolatxonalarini qoʻriqlash boʻyicha alohida batalyonining telefon raqamiga qoʻngʻiroq qilib, navbatchi xodim bilan bogʻlandi. Notanish ayol oʻzini shifokor deb tanishtirdi va quyidagilarni aytdi: “Qizingiz yoʻl-transport hodisasida jarohat oldi, uni davolash uchun jarrohlik amaliyotini oʻtkazish lozim, siz zudlik bilan 20 ming AQSH dollarini topishingiz kerak”. Qoʻngʻiroqqa javob bergan “Qoʻriqlash” xizmati xodimi firibgarlar qoʻngʻiroq qilayotganini darhol anglab, firibgarni qoʻlga olish maqsadida "qizini qutqarish uchun" uchrashishga va pul berishga tayyorligini aytdi. Ayol Pokiston elchixonasi yaqinida uchrashuv tayinladi, lekin u pulni olib ketish uchun oʻzi kelmasligini, oʻrniga “Ruslan” ismli tanishini yuborishini aytdi.
20 daqiqadan soʻng, “Ruslan” xavfsizlik postining rasmiy telefon raqamiga qoʻngʻiroq qilib, jarohatlangan qizning otasini kutayotganini aytdi. Firibgar uchrashuv belgilangan joyda xodimlar tomonidan qoʻlga olindi va Yakkasaroy tumani ichki ishlar boʻlimiga olib borildi. Fuqaroning shaxsi tekshirilganda, u aslida Chilonzor tumanida yashovchi Samandar ismli 23 yoshli fuqaro ekanligi aniqlandi.
Ayni paytda Toshkent shahar IIBB tomonidan tergovga qadar surishtiruv ishlari olib borilmoqda. Surishtiruv davomida uning sherigi aniqlanadi, shuningdek, boshqa shu kabi jinoyatlarga aloqadorligi tekshiriladi.
Aziz yurtdoshlar! Agar begonalar sizga qoʻngʻiroq qilib, oila aʼzolaringiz yoki doʻstlaringiz bilan baxtsiz hodisa yuz bergani va ularni qutqarish uchun pul zarurligi aytishsa, shoshilmang. Avval, oilangiz va doʻstlaringiz bilan bogʻlaning va ularning ahvoli haqida bilib oling, soʻngra firibgarlar haqida darhol huquqni muhofaza qilish organlariga xabar bering. Hushyor boʻling, firibgarlarning tuzogʻiga tushib qolmang.