Миллий гвардия “Қўриқлаш” хизмати ходими томонидан фирибгар қўлга олинди
Жорий йилнинг 4 апрел куни соат 16.15 да номаълум шахс “Қўриқлаш” бош бошқармасининг хорижий давлатларнинг дипломатик ваколатхоналарини қўриқлаш бўйича алоҳида батальонининг телефон рақамига қўнғироқ қилиб, навбатчи ходим билан боғланди. Нотаниш аёл ўзини шифокор деб таништирди ва қуйидагиларни айтди: “Қизингиз йўл-транспорт ҳодисасида жароҳат олди, уни даволаш учун жарроҳлик амалиётини ўтказиш лозим, сиз зудлик билан 20 минг АҚШ долларини топишингиз керак”. Қўнғироққа жавоб берган “Қўриқлаш” хизмати ходими фирибгарлар қўнғироқ қилаётганини дарҳол англаб, фирибгарни қўлга олиш мақсадида "қизини қутқариш учун" учрашишга ва пул беришга тайёрлигини айтди. Аёл Покистон элчихонаси яқинида учрашув тайинлади, лекин у пулни олиб кетиш учун ўзи келмаслигини, ўрнига “Руслан” исмли танишини юборишини айтди.
20 дақиқадан сўнг, “Руслан” хавфсизлик постининг расмий телефон рақамига қўнғироқ қилиб, жароҳатланган қизнинг отасини кутаётганини айтди. Фирибгар учрашув белгиланган жойда ходимлар томонидан қўлга олинди ва Яккасарой тумани ички ишлар бўлимига олиб борилди. Фуқаронинг шахси текширилганда, у аслида Чилонзор туманида яшовчи Самандар исмли 23 ёшли фуқаро эканлиги аниқланди.
Айни пайтда Тошкент шаҳар ИИББ томонидан терговга қадар суриштирув ишлари олиб борилмоқда. Суриштирув давомида унинг шериги аниқланади, шунингдек, бошқа шу каби жиноятларга алоқадорлиги текширилади.
Азиз юртдошлар! Агар бегоналар сизга қўнғироқ қилиб, оила аъзоларингиз ёки дўстларингиз билан бахтсиз ҳодиса юз бергани ва уларни қутқариш учун пул зарурлиги айтишса, шошилманг. Аввал, оилангиз ва дўстларингиз билан боғланинг ва уларнинг аҳволи ҳақида билиб олинг, сўнгра фирибгарлар ҳақида дарҳол ҳуқуқни муҳофаза қилиш органларига хабар беринг. Ҳушёр бўлинг, фирибгарларнинг тузоғига тушиб қолманг.
