Milliy gvardiya tizimida oʻtkazilgan “Dovyurak jangchi” intensiv sinovlarida muvaffaqiyatli ishtirok etgan harbiy xizmatchilarni munosib taqdirlashga bagʻishlangan tantanali tadbir boʻlib oʻtdi va unda koʻkrak nishonlar oʻz egalariga topshirildi
Davlatimiz Rahbarining 2021 yil 10 dekabrdagi “Oʻzbekiston Respublikasi Qurolli Kuchlari harbiy xizmatchilarning jismoniy tayyorgarligini yuqori darajada tashkil etish boʻyicha qoʻshimcha chora-tadbirlar toʻgʻrisida”gi qaroriga asosan Jizzax viloyati "Forish" dala-oʻquv maydonida Milliy gvardiya tizimida “Dovyurak jangchi” intensiv sinovlari oʻtkazildi.
Joriy yilda “Forish” togʻ dala-oʻquv maydonida oʻtkazilgan sinovlarda ishtirokchilar soni 30 foizga oshib, 143 nafarni tashkil etdi. Shundan, 100 nafari, yaʼni 70 foizi “Dovyurak jangchi” degan sharafli unvonga sazovor boʻldilar.
Eʼtiborlisi, bu yilgi sinovlarda ilk bor ayol harbiy xizmatchilarimiz ham ishtirok etib, sinovlarda oʻzining matonati bilan ijobiy natijalarni qayd etgan kapitan I.Asilova xizmatdoshlariga namuna koʻrsata oldi desak mubolagʻa boʻlmaydi.
Sinovda muvaffaqiyatli ishtirok etgan harbiy xizmatchilarni munosib taqdirlashga bagʻishlangan tantanali tadbir Milliy gvardiya Markaziy devonida tashkil etildi va unda Milliy gvardiya qoʻmondoni general-mayor R.Djurayev tomonidan koʻkrak nishonlar oʻz egalariga topshirildi.
