Миллий гвардия тизимида ўтказилган “Довюрак жангчи” интенсив синовларида муваффақиятли иштирок этган ҳарбий хизматчиларни муносиб тақдирлашга бағишланган тантанали тадбир бўлиб ўтди ва унда кўкрак нишонлар ўз эгаларига топширилди
Давлатимиз Раҳбарининг 2021 йил 10 декабрдаги “Ўзбекистон Республикаси Қуролли Кучлари ҳарбий хизматчиларнинг жисмоний тайёргарлигини юқори даражада ташкил этиш бўйича қўшимча чора-тадбирлар тўғрисида”ги қарорига асосан Жиззах вилояти "Фориш" дала-ўқув майдонида Миллий гвардия тизимида “Довюрак жангчи” интенсив синовлари ўтказилди.
Жорий йилда “Фориш” тоғ дала-ўқув майдонида ўтказилган синовларда иштирокчилар сони 30 фоизга ошиб, 143 нафарни ташкил этди. Шундан, 100 нафари, яъни 70 фоизи “Довюрак жангчи” деган шарафли унвонга сазовор бўлдилар.
Эътиборлиси, бу йилги синовларда илк бор аёл ҳарбий хизматчиларимиз ҳам иштирок этиб, синовларда ўзининг матонати билан ижобий натижаларни қайд этган капитан И.Асилова хизматдошларига намуна кўрсата олди десак муболаға бўлмайди.
Синовда муваффақиятли иштирок этган ҳарбий хизматчиларни муносиб тақдирлашга бағишланган тантанали тадбир Миллий гвардия Марказий девонида ташкил этилди ва унда Миллий гвардия қўмондони генерал-майор Р.Джураев томонидан кўкрак нишонлар ўз эгаларига топширилди.
