Milliy gvardiya Toshkent viloyati boʻyicha boshqarmasi va Yangiyoʻl shahar hokimligi, Yoshlar ishlari agentligi boʻlimi hamkorligida 4-sektordagi otaliqqa olingan yoshlar bilan "Rahbar va yoshlar" uchrashuvi oʻtkazildi.
Muloqot davomida mamlakatimizda yoshlarga qaratilayogan eʼtibor, ularning ilm olishi, kasb-hunar oʻrganishi uchun yaratilgan sharoitlar xususida soʻz yuritildi. Yoshlar bilan bogʻliq jinoyat va huquqbuzarliklarning oldini olish, yoshlarni boʻsh vaqtlarini mazmunli tashkil etish, ishsiz yoshlarning bandligini taʼminlash borasida fikr-mulohazalar bildirildi. Ishtirokchilarning murojaat va takliflari tinglanib, yoshlarni mavjud muammolarini hal etishga qaratilgan chora-tadbirlar belgilab olindi.
Shuningdek, Milliy gvardiya markaziy devoni masʼul ofitserlari va Yangiyoʻl shahar Maʼnaviyat va maʼrifat markazi tomonidan 10-sonli umumtaʼlim maktabi hududida “Men ham harbiy boʻlaman” deb nomlangan kitob taqdimoti oʻtkazildi. Tadbirda ishtirok etgan mazkur kitob targʻibotchilari boʻlgan harbiy fanlar doktorlari va huquqshunos olimlar ushbu kitobning yoshlarni vatanparvarlik ruhida ulgʻayishi uchun naqadar ahamiyatli ekanligini taʼkidlashdi. Ular kitobning har bir bobida voqealiklaring qanday ustalik bilan yoritilganligini soʻzlab berishdi. Kitob ustida ish olib borgan mutaxassislar manbalarning ishonchli ekanligini taʼminlash uchun buyuk sarkardalarning bosib oʻtgan yoʻllari boʻylab ekspozitsiyalar oʻtkazilganligini soʻzlab berishdi. Shuningdek, kitobning yoshlar orasida ommalashishi uchun QR koddan foydalanib, mobil qurilmalar orqali video qoʻllanmalarni tomosha qilish imkoniyatini ishga tushirishgan. Shuningdek, tadbir davomida oʻquvchilar uchun Qoʻriqlash bosh boshqarmasi ashula va raqs ansambli xonandalari tomonidan konsert dasturi tashkillashtirildi.
Bundan tashqari kunning ikkinchi yarmida Yangiyoʻl shahar "Lazzat" mahallasi hududida joylashgan 12-umumtaʼlim maktabida 2-sektorga qarashli mahallalarda otaliqqa olingan yoshlar oʻrtasida turli sport musobaqalari va Milliy gvardiya ashula va raqs ansambli jamoasining konsert dasturlari oʻtkazildi.
