Миллий гвардия Тошкент вилояти бўйича бошқармаси ва Янгийўл шаҳар ҳокимлиги, Ёшлар ишлари агентлиги бўлими ҳамкорлигида 4-сектордаги оталиққа олинган ёшлар билан "Раҳбар ва ёшлар" учрашуви ўтказилди.
Мулоқот давомида мамлакатимизда ёшларга қаратилаёган эътибор, уларнинг илм олиши, касб-ҳунар ўрганиши учун яратилган шароитлар хусусида сўз юритилди. Ёшлар билан боғлиқ жиноят ва ҳуқуқбузарликларнинг олдини олиш, ёшларни бўш вақтларини мазмунли ташкил этиш, ишсиз ёшларнинг бандлигини таъминлаш борасида фикр-мулоҳазалар билдирилди. Иштирокчиларнинг мурожаат ва таклифлари тингланиб, ёшларни мавжуд муаммоларини ҳал этишга қаратилган чора-тадбирлар белгилаб олинди.
Шунингдек, Миллий гвардия марказий девони масъул офицерлари ва Янгийўл шаҳар Маънавият ва маърифат маркази томонидан 10-сонли умумтаълим мактаби ҳудудида “Мен ҳам ҳарбий бўламан” деб номланган китоб тақдимоти ўтказилди. Тадбирда иштирок этган мазкур китоб тарғиботчилари бўлган ҳарбий фанлар докторлари ва ҳуқуқшунос олимлар ушбу китобнинг ёшларни ватанпарварлик руҳида улғайиши учун нақадар аҳамиятли эканлигини таъкидлашди. Улар китобнинг ҳар бир бобида воқеаликларинг қандай усталик билан ёритилганлигини сўзлаб беришди. Китоб устида иш олиб борган мутахассислар манбаларнинг ишончли эканлигини таъминлаш учун буюк саркардаларнинг босиб ўтган йўллари бўйлаб экспозициялар ўтказилганлигини сўзлаб беришди. Шунингдек, китобнинг ёшлар орасида оммалашиши учун ҚР коддан фойдаланиб, мобил қурилмалар орқали видео қўлланмаларни томоша қилиш имкониятини ишга туширишган. Шунингдек, тадбир давомида ўқувчилар учун Қўриқлаш бош бошқармаси ашула ва рақс ансамбли хонандалари томонидан концерт дастури ташкиллаштирилди.
Бундан ташқари куннинг иккинчи ярмида Янгийўл шаҳар «Лаззат» маҳалласи ҳудудида жойлашган 12-умумтаълим мактабида 2-секторга қарашли маҳаллаларда оталиққа олинган ёшлар ўртасида турли спорт мусобақалари ва Миллий гвардия ашула ва рақс ансамбли жамоасининг концерт дастурлари ўтказилди.
