Milliy gvardiya tizimidagi o‘qituvchi va murabbiylar uchun bayram munosabati bilan tantanali tadbir tashkillashtirildi va bir qator fidoyi xodimlar munosib taqdirlandi
O‘qituvchi va murabbiylar hamisha eʼzozda!
Inson hayoti va taqdiri, jamiyat va davlat taraqqiyoti, mamlakat qudrati va millat kelajagining poydevori shubhasiz – ilm-fan, taʼlim va tarbiyadir. Albatta, bunda ustoz va murabbiylar roli beqiyos bo‘lib, ular alohida hurmat va ehtiromga loyiqdirlar.
Milliy gvardiya tizimidagi O‘qituvchi va murabbiylar uchun bayram munosabati bilan tantanali tadbir tashkillashtirildi va unda Milliy gvardiya qo‘mondoni general-mayor R.Djurayev ishtirok etib, barcha ustozlar va faxriylarni samimiy qutladi hamda yoshlarning yuqori natijalarga erishishida fidoyi va zahmatkash ustozlar va murabbiylarning ulkan hissasini alohida eʼtirof etdi.
Shundan so‘ng, o‘z hayotini taʼlim berish kabi mashaqqatli va sharafli ishga bag‘ishlagan bir guruh professor-o‘qituvchilar hamda murabbiylarni rag‘batlantirish to‘g‘risidagi qo‘mondon buyrug‘i o‘qib eshittirildi.
Unga ko‘ra, O‘zbekiston Jamoat xavfsizligi universiteti, “Temurbeklar maktabi” harbiy akademik litseyi, harbiy musiqa akademik litseyi, Milliy gvardiya Ixtisoslashtirilgan o‘quv markazi, Toshkent mintaqaviy o‘quv markazi, Milliy gvardiya huzuridagi Bolalar psixologiyasi markazi, “Yosh gvardiyachilar” BO‘SM, Mehribonlik uyi, Ot sporti maktabi hamda hududiy tuzilmalardan jami 100 ga yaqin o‘qituvchi va murabbiylar munosib rag‘batlantirildi.
Xususan, fidoyilik ko‘rsatgan bir qator o‘qituvchi va murabbiylar Milliy gvardiyaning III darajali “Namunali xizmatlari uchun”, “O‘zbekiston Respublikasi Milliy gvardiyasi fidoyi xodimi”, “Maʼnaviyat aʼlochisi” ko‘krak nishonlari hamda faxriy yorliqlari bilan taqdirlandilar.
Tadbir so‘ngida Milliy gvardiya ashula va raqs ansamblining kuy-qo‘shiqlari, jozibali raqslari hamda yosh talantlar chiqishlari tantanali marosimning barcha ishtirokchilariga bayramona kayfiyat ulashdi.
