Миллий гвардия тизимидаги ўқитувчи ва мураббийлар учун байрам муносабати билан тантанали тадбир ташкиллаштирилди ва бир қатор фидойи ходимлар муносиб тақдирланди
Ўқитувчи ва мураббийлар ҳамиша эъзозда!
Инсон ҳаёти ва тақдири, жамият ва давлат тараққиёти, мамлакат қудрати ва миллат келажагининг пойдевори шубҳасиз – илм-фан, таълим ва тарбиядир. Албатта, бунда устоз ва мураббийлар роли беқиёс бўлиб, улар алоҳида ҳурмат ва эҳтиромга лойиқдирлар.
Миллий гвардия тизимидаги Ўқитувчи ва мураббийлар учун байрам муносабати билан тантанали тадбир ташкиллаштирилди ва унда Миллий гвардия қўмондони генерал-майор Р.Джураев иштирок этиб, барча устозлар ва фахрийларни самимий қутлади ҳамда ёшларнинг юқори натижаларга эришишида фидойи ва заҳматкаш устозлар ва мураббийларнинг улкан ҳиссасини алоҳида эътироф этди.
Шундан сўнг, ўз ҳаётини таълим бериш каби машаққатли ва шарафли ишга бағишлаган бир гуруҳ профессор-ўқитувчилар ҳамда мураббийларни рағбатлантириш тўғрисидаги қўмондон буйруғи ўқиб эшиттирилди.
Унга кўра, Ўзбекистон Жамоат хавфсизлиги университети, “Темурбеклар мактаби” ҳарбий академик лицейи, ҳарбий мусиқа академик лицейи, Миллий гвардия Ихтисослаштирилган ўқув маркази, Тошкент минтақавий ўқув маркази, Миллий гвардия ҳузуридаги Болалар психологияси маркази, “Ёш гвардиячилар” БЎСМ, Меҳрибонлик уйи, От спорти мактаби ҳамда ҳудудий тузилмалардан жами 100 га яқин ўқитувчи ва мураббийлар муносиб рағбатлантирилди.
Хусусан, фидойилик кўрсатган бир қатор ўқитувчи ва мураббийлар Миллий гвардиянинг III даражали “Намунали хизматлари учун”, “Ўзбекистон Республикаси Миллий гвардияси фидойи ходими”, “Маънавият аълочиси” кўкрак нишонлари ҳамда фахрий ёрлиқлари билан тақдирландилар.
Тадбир сўнгида Миллий гвардия ашула ва рақс ансамблининг куй-қўшиқлари, жозибали рақслари ҳамда ёш талантлар чиқишлари тантанали маросимнинг барча иштирокчиларига байрамона кайфият улашди.
