Milliy gvardiya tizimida xizmat qilayotgan harbiy xizmatchi va xodimlar o‘rtasida "Buyuk va muqaddassan mustaqil Vatan!" shiori ostidagi qo‘shiqlar ko‘rik - tanlovining respublika bosqichi yakunlandi va tantanali taqdirlash marosimi bo‘lib o‘tdi.
Milliy gvardiya harbiy xizmatchi va xodimlari o‘rtasida o‘tkazilgan mazkur qo‘shiqlar ko‘rik tanlovi hududiy saralash va respublika bosqichlari doirasida o‘tkazildi. Respublika bosqichida 20 nafar iqtidor egalari ikki kun davomida final bellashuvlarida o‘z ijod namunalarini qo‘shiq va musiqa yo‘nalishidagi olimlar, sanʼat va madaniyat xodimlari hamda tomoshabinlarga havola etishdi. Tanlovda ishtirokchilar lirika, estrada va saf qo‘shiqlari yo‘nalishda o‘z asarlarini jonli ijroda kuylab, o‘zaro bellashdilar. G‘olib va sovrindorlarni taqdirlash marosimi Toshkent shahar yoshlar markazida tashkillashtirildi. Marosim avvalida Yoshlar shaharchasida o‘quvchilar, Toshkent shahrining 12 tumanidan tashrif buyurgan uyushmagan yoshlar, Mehribonlik va muruvvat uylari tarbiyalanuvchilari uchun harbiy vatanparvarlik sport musobaqalari hamda besh tashabbus doirasidagi tadbirlar o‘tkazildi. Milliy gvardiya alohida harbiy namunali-ko‘rgazmali orkestri ijrosidagi vatanni madh etuvchi musiqiy chiqishlar yoshlarni o‘ziga qamrab olgan bo‘lsa, harbiy orkestrning kelajagi bo‘lmish harbiy musiqa akademik litseyi jamoasi ijrosidagi dillarni xushnud etuvchi, o‘g‘il-qizlarning ko‘ngliga yo‘l topuvchi kuy-navolari tadbirga chinakam bayramona ruh bag‘ishladi. Shuningdek, musiqa to‘garagi o‘quvchilarining doira, o‘zbek jang sanʼati va taekvondo sport turlari bo‘yicha yosh sportchilarning ko‘rgazmali chiqishlari ham yig‘ilganlarda katta taassurot qoldirdi.
Shu bilan bir qatorda, arqon tortish milliy xalq o‘yinlari,tosh ko‘tarish mashqlari hamda kamondan otish sporti bo‘yicha o‘tkazilgan musobaqalarda barcha tadbir ishtirokchilari o‘z imkoniyatlarini sinovdan o‘tkazishdi. Faxriy qorovul bo‘linmasi harbiy xizmatchilarining qurol bilan ko‘rgazmali saf chiqishlari yoshlarning qalbida harbiy kasbga bo‘lgan qiziqishini yana-da oshirdi.
Shundan so‘ng, barcha yoshlar markazida o‘tkaziladigan qo‘shiqlar tanlovining taqdirlash marosimiga taklif etildi. Mehmonlarni markaz kirish qismida kitoblar yarmarkasi va rassomchilik ko‘rgazmasi qarshi oldi. Badiiy va sanʼat asarlari bilan tanishgan yoshlar hamda harbiy xizmatchilarning oila aʼzolari taqdirlash marosimining konsert dasturidan bahramand bo‘lishdi. Nominatsiyalar bo‘yicha va tanlovning g‘olib va sovrindorlar deb topilgan ishtirokchilarga tashkilotchilar tomonidan diplom va qimmatbaho sovg‘alar topshirildi. Mutlaq g‘oliblikka Milliy gvardiya Andijon viloyati bo‘yicha boshqarmasi harbiy xizmatchisi serjant Xolmatov Fazliddin Patidinovich loyiq deb topildi.
Tadbir kuy qo‘shiqlar va ko‘rgazmali chiqishlar bilan yig‘ilganlarga ko‘tarinki kayfiyat bag‘ishladi.
