Миллий гвардия тизимида хизмат қилаётган ҳарбий хизматчи ва ходимлар ўртасида "Буюк ва муқаддассан мустақил Ватан!" шиори остидаги қўшиқлар кўрик - танловининг республика босқичи якунланди ва тантанали тақдирлаш маросими бўлиб ўтди.
Миллий гвардия ҳарбий хизматчи ва ходимлари ўртасида ўтказилган мазкур қўшиқлар кўрик танлови ҳудудий саралаш ва республика босқичлари доирасида ўтказилди. Республика босқичида 20 нафар иқтидор эгалари икки кун давомида финал беллашувларида ўз ижод намуналарини қўшиқ ва мусиқа йўналишидаги олимлар, санъат ва маданият ходимлари ҳамда томошабинларга ҳавола этишди. Танловда иштирокчилар лирика, эстрада ва саф қўшиқлари йўналишда ўз асарларини жонли ижрода куйлаб, ўзаро беллашдилар. Ғолиб ва совриндорларни тақдирлаш маросими Тошкент шаҳар ёшлар марказида ташкиллаштирилди. Маросим аввалида Ёшлар шаҳарчасида ўқувчилар, Тошкент шаҳрининг 12 туманидан ташриф буюрган уюшмаган ёшлар, Меҳрибонлик ва мурувват уйлари тарбияланувчилари учун ҳарбий ватанпарварлик спорт мусобақалари ҳамда беш ташаббус доирасидаги тадбирлар ўтказилди. Миллий гвардия алоҳида ҳарбий намунали-кўргазмали оркестри ижросидаги ватанни мадҳ этувчи мусиқий чиқишлар ёшларни ўзига қамраб олган бўлса, ҳарбий оркестрнинг келажаги бўлмиш ҳарбий мусиқа академик лицейи жамоаси ижросидаги дилларни хушнуд этувчи, ўғил-қизларнинг кўнглига йўл топувчи куй-наволари тадбирга чинакам байрамона руҳ бағишлади. Шунингдек, мусиқа тўгараги ўқувчиларининг доира, ўзбек жанг санъати ва таэквондо спорт турлари бўйича ёш спортчиларнинг кўргазмали чиқишлари ҳам йиғилганларда катта таассурот қолдирди.
Шу билан бир қаторда, арқон тортиш миллий халқ ўйинлари,тош кўтариш машқлари ҳамда камондан отиш спорти бўйича ўтказилган мусобақаларда барча тадбир иштирокчилари ўз имкониятларини синовдан ўтказишди. Фахрий қоровул бўлинмаси ҳарбий хизматчиларининг қурол билан кўргазмали саф чиқишлари ёшларнинг қалбида ҳарбий касбга бўлган қизиқишини янада оширди.
Шундан сўнг, барча ёшлар марказида ўтказиладиган қўшиқлар танловининг тақдирлаш маросимига таклиф этилди. Меҳмонларни марказ кириш қисмида китоблар ярмаркаси ва рассомчилик кўргазмаси қарши олди. Бадиий ва санъат асарлари билан танишган ёшлар ҳамда ҳарбий хизматчиларнинг оила аъзолари тақдирлаш маросимининг концерт дастуридан баҳраманд бўлишди. Номинациялар бўйича ва танловнинг ғолиб ва совриндорлар деб топилган иштирокчиларга ташкилотчилар томонидан диплом ва қимматбаҳо совғалар топширилди. Мутлақ ғолибликка Миллий гвардия Андижон вилояти бўйича бошқармаси ҳарбий хизматчиси сержант Холматов Фазлиддин Патидинович лойиқ деб топилди.
Тадбир куй қўшиқлар ва кўргазмали чиқишлар билан йиғилганларга кўтаринки кайфият бағишлади.
