Mamlakatimizda amalga oshirilayotgan keng ko‘lamli islohotlar avvalo, xalqimiz farovonligini taʼminlash, fuqarolarimizning huquq va erkinliklari, qonuniy manfaatlarini ishonchli himoya qilish, aholi, ayniqsa, yoshlarning iqtidori va qobiliyatlarini ro‘yobga chiqarish, ularning bandligini taʼminlashga xizmat qilib kelayotganligi shubhasiz.

Ushbu islohotlar samarasi o‘laroq, Milliy gvardiya Buxoro viloyati bo‘yicha boshqarmasida ham sohaga yuqori kasbiy mahoratga ega, zimmasiga yuklatilgan vazifalarga sidqidildan yondosha oladigan, maʼnaviy barkamol va jismonan yetuk kadrlarni jalb qilish bo‘yicha qator chora-tadbirlar amalga oshirilmoqda.

Xususan, davlatimiz rahbarining joriy yil 15 apreldagi "Jamoat xavfsizligini taʼminlash sohasida professional kadrlarni tayyorlash tizimini yana-da takomillashtirish chora-tadbirlari to‘g‘risida" qarori bu boradagi muhim tashabbus bo‘ldi. Shu maʼnoda, kuni kecha ushbu qarorning ijrosi doirasida Milliy gvardiya tizimida xizmat qilish istagida bo‘lgan va turli sport turlari bo‘yicha jahon, Osiyo hamda O‘zbekiston chempioni va sovrindori bo‘lgan sportchilar hamda ularning ota-onalari bilan boshqarma masʼul xodimlari ishtirokida uchrashuv o‘tkazildi.

Uchrashuv davomida, yoshlarga tizimda xizmat o‘tash tartibi, harbiy xizmatchi va xodimlar uchun yaratilayotgan imtiyozlar, belgilangan talablar va sharoitlar, “Vatanga va xalqqa sadoqat bilan xizmat qilish-oliy burchimiz” konseptual g‘oyasi asosida xizmat qilish shartlari to‘g‘risida tushunchalar berildi.

Shuningdek, yig‘ilish yakunida ishtirokchilarga ishga kirish bilan bog‘liq masalalarda faqatgina tizimning masʼul xodimlariga murojaat etish hamda firibgarlarning tuzog‘iga tushib qolmaslik yuzasidan tushuntirishlar olib borildi va zarur tavsiyalar berildi.