Milliy gvardiya tomonidan tashkil etilgan festival Yangi O‘zbekistonning minglab yoshlarini birlashtirdi
Poytaxtimizning Olmazor tumanidagi “Yosh gvardiyachilar” Bolalar va o‘smirlar sport maktabida “Yangi O‘zbekiston yoshlari, birlashaylik!” shiori ostida 30 iyun – Yoshlar kuniga bag‘ishlangan festival bo‘lib o‘tdi.
Yetti yoshdan 18 yoshgacha bo‘lgan minglab bolalarni jamlagan tadbirdan ko‘zlangan asosiy maqsad yosh avlodni harbiy-vatanparvarlik ruhida tarbiyalash, yoshlarni sportga keng jalb etishdan iborat.
Yosh sportchilar – “Yosh gvardiyachilar” maktabi o‘quvchilari o‘z muvaffaqiyatlarini namoyish etdi. Ko‘plab tomoshabinlar tomonidan velosportchilar, futbolchilar, basketbolchilar, txekvondochilar va gimnastikachilar olqishlandi. O‘smirlar bo‘lsa o‘zbek jang sanʼati jamoalari va yakka kurash bo‘yicha “Turon” jamoalaridagi tengdoshlarining chiqishlarini zavq bilan tomosha qilishdi.
Qo‘l jangi texnikasini mahorat bilan ko‘rsatgan Jamoat xavfsizligi universiteti kursantlari va faxriy qorovulning yosh harbiylari chiroyli libosda, musiqa sadolari ostida yoshlarning qalbini zabt etishdi. Harbiy orkestr tomoshabinlar tribunalar oldidan tantanali marshda o‘tib, so‘ngra qurollar bilan mashq qilish texnikasini namoyish etishdi.
Shuningdek, kinologlarning xizmat itlari bilan chiqishlari hech kimni befarq qoldirmadi.
Milliy gvardiya Maʼnaviyat va maʼrifat markazi qoshidagi ashula va raqs ansambli sanʼatkorlarining chiqishlari ham bayramona kayfiyat bag‘ishladi. Harbiy orkestr ijrosidagi musiqiy kompozitsiyalar esa festivalga o‘zgacha shukuh bag‘ishladi.
Festival doirasida kamondan otish, arqon tortish, og‘ir ko‘tarish bo‘yicha musobaqalar ham tashkil etildi.
