Миллий гвардия томонидан ташкил этилган фестиваль Янги Ўзбекистоннинг минглаб ёшларини бирлаштирди
Пойтахтимизнинг Олмазор туманидаги “Ёш гвардиячилар” Болалар ва ўсмирлар спорт мактабида “Янги Ўзбекистон ёшлари, бирлашайлик!” шиори остида 30 июнь – Ёшлар кунига бағишланган фестиваль бўлиб ўтди.
Етти ёшдан 18 ёшгача бўлган минглаб болаларни жамлаган тадбирдан кўзланган асосий мақсад ёш авлодни ҳарбий-ватанпарварлик руҳида тарбиялаш, ёшларни спортга кенг жалб этишдан иборат.
Ёш спортчилар – “Ёш гвардиячилар” мактаби ўқувчилари ўз муваффақиятларини намойиш этди. Кўплаб томошабинлар томонидан велоспортчилар, футболчилар, баскетболчилар, тхеквондочилар ва гимнастикачилар олқишланди. Ўсмирлар бўлса ўзбек жанг санъати жамоалари ва якка кураш бўйича “Турон” жамоаларидаги тенгдошларининг чиқишларини завқ билан томоша қилишди.
Қўл жанги техникасини маҳорат билан кўрсатган Жамоат хавфсизлиги университети курсантлари ва фахрий қоровулнинг ёш ҳарбийлари чиройли либосда, мусиқа садолари остида ёшларнинг қалбини забт этишди. Ҳарбий оркестр томошабинлар трибуналар олдидан тантанали маршда ўтиб, сўнгра қуроллар билан машқ қилиш техникасини намойиш этишди.
Шунингдек, кинологларнинг хизмат итлари билан чиқишлари ҳеч кимни бефарқ қолдирмади.
Миллий гвардия Маънавият ва маърифат маркази қошидаги ашула ва рақс ансамбли санъаткорларининг чиқишлари ҳам байрамона кайфият бағишлади. Ҳарбий оркестр ижросидаги мусиқий композитциялар эса фестивалга ўзгача шукуҳ бағишлади.
Фестивал доирасида камондан отиш, арқон тортиш, оғир кўтариш бўйича мусобақалар ҳам ташкил этилди.
