Mutaxassislarni tayyorlash kurslari bitiruvchilariga sertifikatlar tantanali ravishda topshirildi O‘zbekiston Respublikasi Milliy Gvardiya Ixtisoslashtirilgan o‘quv markazida mutaxassislarni tayyorlash kurslarining navbatdagi bitiruv marosimiga bag‘ishlangan tantanali tadbir bo‘lib o‘tdi.

Tadbirga, O‘zbekiston Respublikasi Milliy Gvardiyasi qo‘mondoni o‘rinbosari polkovnik S.Mamayusupov, Ichki ishlar vazirligi Qorovul qo‘shinlari bo‘lim boshlig‘i podpolkovnik D.Intantin, Ichki Ishlar vazirligining Xalqaro aeroportlarda xavfsizlikni taʼminlash qo‘shinlari qo‘mondoni birinchi o‘rinbosari polkovnik I.To‘xtasinovlar tashrif buyurdi.

Marosim avvalida so‘z olgan mutasaddilar kurslarni muvaffaqiyatli tugatgan harbiy xizmatchi va xodimlarga o‘zlarining iliq tilaklarini bildirishdi va kelgusidagi xizmatlarida omad tilashdi.

Shundan so‘ng, mutaxassisliklari bo‘yicha o‘q otish, balandlikni ishg‘ol qilish, ruhiy-jismoniy, aloqa, maxsus taktik hamda harbiy muhandislik tayyorgarligi fanlaridan nazariy va amaliy mashg‘ulotlar davomida bilim va ko‘nikmalarga ega bo‘lgan harbiy xizmatchi va xodimlarga sertifikatlar tantanali ravishda topshirildi.

Shu bilan birga, bitiruvchi xarbiy hizmatchilar orasidan kichik serjant D.Abdinazarov va B.Xudoyberdiyevlar so‘zga chiqib, o‘zlarining bitiruvchi safdoshlariga va markazda tahsil bergan ustoz hamda murabbiylarga o‘z minnatdorchiligini bildirishdi.

Tadbirning badiiy qismida bo‘lsa, Faxriy qorovul hamda Milliy gvardiya harbiy qism tomonidan namoyish etilgan ko‘rgazmali chiqishlar va qo‘l jangi usullari barchaga ko‘tarinki kayfiyat bag‘ishladi.