Bugun yurtimizda yoshlarni sportga jalb qilish, bo‘sh vaqtlarini mazmunli o‘tkazish, ular orasida uchrashi mumkin bo‘lgan salbiy illatlar va turli xil jinoyatchiliklarning oldini olish hamda ular o‘rtasida sog‘lom turmush tarzini targ‘ib etish maqsadida O‘zbekiston Respublikasi Jamoat xavfsizligi universitetida sportning boks, sambo, K1 va armrestling turlari bo‘yicha Olimpiada va jahon chempionlari ishtirokida “Milliy gvardiya sportchilari va yoshlar” mavzusida maʼnaviy-maʼrifiy tadbir o‘tkazildi.

Davra suhbatida boks bo‘yicha olimpiada chempioni F. G‘oyibnazarov, sambo bo‘yicha jahon chempionlari O. Xudoyqulov, F. Jumayev va sportning K1 turi bo‘yicha jahon chempioni Sh. Yo‘ldoshev, armrestling bo‘yicha Osiyo chempioni A. Obloqulovlar kabi sport ustalari, Universitet ofitser va kursantlari hamda Olmazor tuman Yoshlar ittifoqi vakillari ishtirok etdi.

Uchrashuvda ishtirokchilar tomonidan hozirgi kunda yurtimizda sportni rivojlantirishga va yosh sportchilarni xalqaro miqyosdagi musobaqalarga tayyorlash, jismoniy salohiyati yuqori, ruhiy tetik sportchilarni tarbiyalashga katta eʼtibor qaratilayotgani va bundan tashqari turli ziddiyatlar kuchayib borayotgan bugungi kunda yoshlarimizning maʼnaviy immunitetini kuchaytirish, ularning bo‘sh vaqtini mazmunli o‘tkazish har qachongidan ham dolzarb ekanligi taʼkidlab o‘tildi.

Suhbat davomida kursantlar o‘zlari qiziqqan savollarni berib, sportchilarga ulkan zafarlar tiladilar. Shu bilan birga sportchilar ham universitet rahbariyatiga hamda kursantlarga mehmondo‘stlik va iliq suhbat uchun minnatdorlik bildirdilar.

Tadbir so‘ngida ishtirokchilarga tashkilotchilar tomonidan tashakkurnomalar berildi.