Milliy gvardiya harbiy xizmatchi va xodimlari tomonidan noqonuniy pirotexnika vositalari savdosining oldi olinmoqda.
Bayram - Yangi yil qanchalik yaqin bo‘lsa, sertifikatsiz pirotexnika vositalarini sotishdan daromad olishni istaganlar shunchalik faollashadi. Shu bois Milliy gvardiya hamda boshqa huquqni muhofaza qiluvchi organlari harbiy xizmatchi va xodimlariga sertifikatlanmagan pirotexnika vositalarini sotish bo‘yicha maʼlumotlarni aniqlash va ularga chek qo‘yish vazifasi qo‘yilmoqda. Harbiy xizmatchi va xodimlar tomonidan respublika miqyosida amalga oshirilgan tezkor-profilaktik tadbirlar natijasida noqonuniy pirotexnika vositalari savdosining oldi olindi.
NAMANGAN VILOYATI. Milliy gvardiya Namangan viloyati bo‘yicha boshqarmasi harbiy xizmatchilari tomonidan sertifikatsiz pirotexnika vositalarini sotayogan yigit qo‘lga olindi. 16 yoshli M.S. xolislar va o‘smirning qarindoshlari ishtirokida ko‘rikdan o‘tkazilganda, uning sumkasida 13 blok (har biri 130 quti) “Britanik” bombalari va 2 o‘ram "Snaryad svetnaya babochka" nomli pirotexnika vositalari mavjudligi maʼlum bo‘ldi. Mazkur holat yuzasidan surishtiruv ishlari olib borilmoqda.
SAMARQAND VILOYATI. Milliy gvardiya Samarqand viloyati bo‘yicha boshqarmasi harbiy xizmatchilari tomonidan pirotexnika vositalarining noqonuniy savdosiga qarshi o‘tkazilgan reyd tadbirlari davomida 5 dona “Teraniya” pirotexnika vositalarini 700 ming so‘mga sotmoqchi bo‘lgan shaxs voqea joyida ushlandi. Dastlabki surishtiruv ishlarida huquqbuzar samarqandlik 2007 y.t. I.R. ekanligi maʼlum bo‘ldi. Fuqaro voyaga yetmaganligi bois, o‘smirning yaqinlari voqea haqida zudlik bilan xabardor qilinib, ular ishtirokida huquqbuzarlik yuzasidan bayonnoma tuzildi.
JIZZAX VILOYATI. Milliy gvardiya Jizzax viloyati bo‘yicha boshqarmasi harbiy xizmatchilari tomonidan sertifikatsiz pirotexnika mahsulotlarini sotish bilan bog‘liq 5 ta holat aniqlandi. Bu bilan asosan yoshlar, jumladan, voyaga yetmaganlar shug‘ullangan. Xolislar ishtirokida o‘tkazilgan tezkor-profilaktik tadbirlar davomida pirotexnika vositalari uchun pul olayotgan 16 yoshli R.I. qo‘lga olindi. Uning yonidan 2 dona (har biri 20 o‘ram) “Britanik” nomli pirotexnika vositalari topilib, musodara qilindi.
19 yoshli fuqaro B.N. ham jami 1 million so‘mlik pirotexnika vositalarini sotmoqchi bo‘lgan vaqtida qo‘lga olindi. Harbiy xizmatchilar tomonidan xolislar ishtirokida 10 ta “Britaniya” nomli pirotexnika vositalari musodara qilindi.
Jizzax shahrida yashovchi 18 yoshli fuqaro B.B. pirotexnika vositalarini 440 000 so‘mga sotmoqchi bo‘lgan vaqtida ushlandi va uning yonidagi 40 quti jami 2400 dona “Britaniya” nomli pirotexnika vositalari musodara qilindi.
20 yoshli fuqaro N.M. ham 5 quti “Britanik”ni 750 ming so‘mga sotayotgan vaqtida qo‘lga olindi.
BUXORO VILOYATI. Milliy gvardiya Buxoro viloyati bo‘yicha boshqarmasi harbiy xizmatchilari hamda Bojxona qo‘mitasi viloyat boshqarmasi xodimlari tomonidan olib borilgan hamkorlikdagi tadbirlarda yirik hajmdagi pirotexnika vositalari ushlandi. Qorovulbozor tumanida yashovchi fuqaro A.Sh.ning yonida 960 000 so‘mga sotmoqchi bo‘lgan 8 quti “Teraniya” nomli pirotexnika vositalari topilib, musodara qilindi. Fuqaro A.Sh.ning so‘zlariga ko‘ra, u pirotexnika vositalarini joriy yilning noyabr oyida Toshkent shahridagi “Qo‘yliq” dehqon bozoridan o‘z tumanida sotish uchun 400 ming so‘mga xarid qilgan.
Pirotexnika vositalarini sotish bilan shug‘ullanayotgan yana bir fuqaro 19 yoshli S. M. ham poytaxtdagi “Qo‘yliq” dehqon bozoridan xavfli mahsulotlarni xarid qilganligi haqida ko‘rsatma berdi. Shuningdek, G‘ijduvon tumanida yashovchi fuqaroning uyidan jami 1 million 300 ming so‘mlik 13 dona “Teraniya” (7 800 dona) topilib, musodara qilindi.
Hurmatli yurtdoshlar!
Shuni eslatib o‘tamizki, pirotexnika mahsulotlari bilan noqonuniy savdo qilish O‘zbekiston Respublikasi Maʼmuriy javobgarlik to‘g‘risidagi kodeksining 185-1-moddasi bo‘yicha ashyolar musodara qilinib, besh baravaridan yigirma baravarigacha miqdorda jarima solishga sabab bo‘ladi.
Pirotexnika buyumlarini qonunga xilof ravishda ishlab chiqarish, tayyorlash, saqlash, tashish, jo‘natish, ulardan foydalanish, huddi shuningdek, ularni qonunga xilof ravishda O‘zbekiston Respublikasiga olib kirish (O‘zbekiston Respublikasidan olib chiqish) yoki o‘tkazish ancha miqdorda yohud shunday harakatlar maʼmuriy jazo qo‘llanilganidan keyin sodir etilgan bo‘lsa, O‘zbekiston Respublikasi Jinoyat kodeksining 250-1-moddasiga asosan jinoiy javobgarlikka tortiladi.
