Milliy gvardiya Farg‘ona viloyati bo‘yicha boshqarmasida buyuk allomamiz mir Alisher Navoiy tavalludining 581 yilligiga bag‘ishlangan maʼnaviy-maʼrifiy tadbir o‘tkazildi
Milliy gvardiya Farg‘ona viloyati bo‘yicha boshqarmasida buyuk allomamiz mir Alisher Navoiy tavalludining 581 yilligiga bag‘ishlangan maʼnaviy-maʼrifiy tadbir o‘tkazildi. Tadbir Milliy gvardiya Farg‘ona viloyati bo‘yicha boshqarmasi rahbariyati, Farg‘ona Harbiy prokuraturasi masʼul xodimlari, Qo‘riqlash boshqarmasi, Farg‘ona shahrida joylashgan 6-maktab o‘quvchi yoshlari, 35 hamda 37- maktab o‘quvchi yoshlari va uyushmagan yoshlar ishtirokida bo‘lib o‘tdi. Tadbirda so‘zga chiqqanlar tomonidan buyuk bobokalonimiz mir Alisher Navoiy hayoti va ijodiga bag‘ishlangan sahna ko‘rinishlari, g‘azallaridan parchalar kuy qo‘shiqlar mahorat bilan ijro etildi. Ayniqsa 37-maktab o‘quvchilari tomonidan ijro etilgan ajoyib raqslar tadbirga ko‘tarinki ruh bag‘ishladi. Tadbir davomida "Siz Navoiyni bilasizmi" viktorinasi ham o‘tkazilishi tadbirga o‘zgacha shukuh bag‘ishladi. Viktorina davomida maktab o‘quvchilari, muddatli harbiy xizmatchi askarlar, uyushmagan yoshlar hamda shartnoma asosidagi harbiy xizmatchilardan tuzilgan jamoalar g‘oliblik uchun qizg‘in kurash olib bordilar. G‘oliblar tashkilotchilar tomonidan tashakkurnoma va kitoblar jamlanmasi bilan taqdirlandi. Tadbir yakunida Farg‘ona shahar madaniyat vazirligi tasarrufidagi 1-sonli musiqa va sanʼat maktabi o‘quvchilari tomonidan ishlangan suratlar ko‘rgazmasi barcha yig‘ilganlarga birdek manzur bo‘ldi.
