MOBIL TELEFON O‘G‘RILIGIDA GUMONLANUVCHILAR QO‘LGA OLINDILAR
Joriy yilning 02 may kuni olingan xabarga ko‘ra Farg‘ona viloyati Qo‘qon shahar IIB va Milliy gvardiya xodimlari hamkorligida tezkor tadbir o‘tkazildi.
Xabarda maʼlum qilinganidek, Qo‘qon shahridagi “Muqimiy” istirohat bog‘ida qiz o‘rtog‘i bilan sayr qilib yurgan fuqaro Z.Z. ni uchta begona yigit oldiga chaqirib olib yonidagi bor pulini chiqarib berishini talab qilib, puli yo‘qligini aytganidan so‘ng uning qo‘lida bo‘lgan “Samsung Galaxy A 31” (bahosi 2.500.000 so‘m bo‘lgan) rusumli telefon apparatini ochiqdan-ochiq tortib olib, hodisa joyidan qochib ketishgan.
Tezkor tadbir davomida arizachi fuqaro Z.Z. o‘ziga tegishli telefon apparatiga qo‘ng‘iroq qilib, telefon apparatini o‘rniga boshqa telefon apparatini berishini iltimos qilgan va kelishib olinganidek Qo‘qon shahridagi “Yoshlar bog‘i” oldida uchrashishgan vaqtida Milliy gvardiya va Qo‘qon shahar IIB xodimlari tomonidan xolislar ishtirokida qo‘lga olingan.
Dastlabki surishtiruv mobaynida ushbu uch nafar shaxs Qo‘qon shahrida yashovchi 2001 yilda tug‘ilgan fuqaro P.E., 2003 yilda tug‘ilgan fuqarolar K.Sh. va M.I. lar ekanligi aniqlangan.
Hozirda mazkur holat yuzasidan Qo‘qon shahar IIB tomonidan surishtiruv ishlari davom etmoqda.
