YОSHLAR SPORT BILAN HAMNAFAS
Milliy gvardiya Surxondaryo viloyati bo‘yicha boshqarmasi harbiy xizmatchilari va xodimlari tomonidan yoshlarni taʼtil kunlarida sport bilan shug‘ullanishga jalb etishga qaratilgan turli sport tadbirlari keng miqyosda o‘tkazilmoqda. 4 yanvar kuni Muzrabot tumanida ham, tuman hokimligi hamkorligida navbatdagi sport musobaqalari tashkil etildi.
Dastlab, o‘g‘il-qizlar tuman markazida joylashgan bolalar va o‘smirlar sport maktabida jam bo‘lishdi. Bu yerda ishtirokchilarga harbiy qurol-aslahalar ko‘rgazmasi hamda harbiy xizmatchilarning sahna ko‘rinishlari namoyish etildi. Bu esa yoshlarning harbiy xizmatga bo‘lgan qiziqishlarini oshirishda muhim omil bo‘ldi.
Shundan so‘ng, sportchi yoshlar sportning "qo‘l jangi" turi bo‘yicha o‘zaro bellashdilar. Qizg‘in va murosasiz bahslarga boy bo‘lgan bellashuv g‘oliblariga medallar va esdalik sovg‘alari topshirildi.
Shuningdek, tumanning chekka hududida joylashgan, Milliy gvardiyaga biriktirilgan 51-sonli umumiy o‘rta taʼlim maktabi o‘quvchilari ishtirokida ham turli sport estafetalari o‘tkazildi. Jismonan baquvvat va ruhan chiniqqan ishtirokchilardan iborat jamoalar musobaqa g‘olibligini qo‘lga kiritdilar. G‘olib jamoa va sovrindorlarga tashkilotchilar tomonidan esdalik sovg‘alari topshirildi. Viloyatda bu kabi tadbirlar davom etmoqda.
