ЁШЛАР СПОРТ БИЛАН ҲАМНАФАС
Миллий гвардия Сурхондарё вилояти бўйича бошқармаси ҳарбий хизматчилари ва ходимлари томонидан ёшларни таътил кунларида спорт билан шуғулланишга жалб этишга қаратилган турли спорт тадбирлари кенг миқёсда ўтказилмоқда. 4 январь куни Музработ туманида ҳам, туман ҳокимлиги ҳамкорлигида навбатдаги спорт мусобақалари ташкил этилди.
Дастлаб, ўғил-қизлар туман марказида жойлашган болалар ва ўсмирлар спорт мактабида жам бўлишди. Бу ерда иштирокчиларга ҳарбий қурол-аслаҳалар кўргазмаси ҳамда ҳарбий хизматчиларнинг саҳна кўринишлари намойиш этилди. Бу эса ёшларнинг ҳарбий хизматга бўлган қизиқишларини оширишда муҳим омил бўлди.
Шундан сўнг, спортчи ёшлар спортнинг "қўл жанги" тури бўйича ўзаро беллашдилар. Қизғин ва муросасиз баҳсларга бой бўлган беллашув ғолибларига медаллар ва эсдалик совғалари топширилди.
Шунингдек, туманнинг чекка ҳудудида жойлашган, Миллий гвардияга бириктирилган 51-сонли умумий ўрта таълим мактаби ўқувчилари иштирокида ҳам турли спорт эстафеталари ўтказилди. Жисмонан бақувват ва руҳан чиниққан иштирокчилардан иборат жамоалар мусобақа ғолиблигини қўлга киритдилар. Ғолиб жамоа ва совриндорларга ташкилотчилар томонидан эсдалик совғалари топширилди. Вилоятда бу каби тадбирлар давом этмоқда.
