“MUQADDASDIR VATAN BAYROG‘I”
O‘zbekiston Respublikasi Davlat bayrog‘i qabul qilinganining 31 yilligi munosabati bilan Prezident taʼlim muassasalari agentligi Mirzo Ulug‘bek nomidagi ixtisoslashtirilgan maktabda Milliy gvardiya Ixtisoslashtirilgan o‘quv markazi tashabbusi bilan “Muqaddasdir Vatan bayrog‘i” shiori ostida madaniy – maʼrifiy tadbir bo‘lib o‘tdi.
Tadbirning dastlabki qismida o‘quv markaz harbiy xizmatchilari va maktab o‘quvchi-yoshlari o‘rtasida Davlatimiz bayrog‘ining yaratilish tarixi, unda aks etgan ranglar va yulduzlar maʼno-mazmuni to‘g‘risida davra suhbati bo‘lib o‘tdi. Maktab o‘quvchilari o‘zlarining qiziqtirgan savollariga soha xodimlaridan javob olishdi.
Tadbir davomida maktab o‘quvchilari sana munosabati bilan o‘tkazilgan “Ranglarda aks etgan Vatan madhi” mavzusidagi rasmlar tanlovida guruhlarga bo‘linib ishtirok etishdi. Eng yaxshi natija ko‘rsatgan yoshlarga bo‘lsa, faxriy yorliq va esdalik sovg‘alar taqdim qilindi.
Milliy gvardiya Faxriy qorovul jamoasining saf usullari bilan va shuningdek, muddatli harbiy xizmatchilarning qo‘l jangi bo‘yicha ko‘rgazmali chiqishlari hamda alohida harbiy namunali ko‘rgazmali orkestri ijrosidagi kuy- qo‘shiqlar ishtirokchilarda katta taassurot qoldirdi.
Shu bilan bir qatorda maktab o‘quvchilari kamondan otish sport turi va Milliy gvardiya xizmat otlarini katta qiziqish bilan kutib olishdi.
Tadbirdan ko‘zlangan asosiy maqsad o‘quvchi yoshlarda Davlatimiz ramzlariga bo‘lgan hurmat - eʼtiborni oshirish, harbiy kasbga yo‘naltirish, ularning ongu tafakkuriga Vatan himoyasi sharafli va muqaddas burch ekanini, milliy armiyamiz bilan faxrlanish, xalqimiz tinchligiga masʼullik tuyg‘ularini chuqur singdirishdir.
