“МУҚАДДАСДИР ВАТАН БАЙРОҒИ”
Ўзбекистон Республикаси Давлат байроғи қабул қилинганининг 31 йиллиги муносабати билан Президент таълим муассасалари агентлиги Мирзо Улуғбек номидаги ихтисослаштирилган мактабда Миллий гвардия Ихтисослаштирилган ўқув маркази ташаббуси билан “Муқаддасдир Ватан байроғи” шиори остида маданий – маърифий тадбир бўлиб ўтди.
Тадбирнинг дастлабки қисмида ўқув марказ ҳарбий хизматчилари ва мактаб ўқувчи-ёшлари ўртасида Давлатимиз байроғининг яратилиш тарихи, унда акс этган ранглар ва юлдузлар маъно-мазмуни тўғрисида давра суҳбати бўлиб ўтди. Мактаб ўқувчилари ўзларининг қизиқтирган саволларига соҳа ходимларидан жавоб олишди.
Тадбир давомида мактаб ўқувчилари сана муносабати билан ўтказилган “Рангларда акс этган Ватан мадҳи” мавзусидаги расмлар танловида гуруҳларга бўлиниб иштирок этишди. Энг яхши натижа кўрсатган ёшларга бўлса, фахрий ёрлиқ ва эсдалик совғалар тақдим қилинди.
Миллий гвардия Фахрий қоровул жамоасининг саф усуллари билан ва шунингдек, муддатли ҳарбий хизматчиларнинг қўл жанги бўйича кўргазмали чиқишлари ҳамда алоҳида ҳарбий намунали кўргазмали оркестри ижросидаги куй- қўшиқлар иштирокчиларда катта таассурот қолдирди.
Шу билан бир қаторда мактаб ўқувчилари камондан отиш спорт тури ва Миллий гвардия хизмат отларини катта қизиқиш билан кутиб олишди.
Тадбирдан кўзланган асосий мақсад ўқувчи ёшларда Давлатимиз рамзларига бўлган ҳурмат - эътиборни ошириш, ҳарбий касбга йўналтириш, уларнинг онгу тафаккурига Ватан ҳимояси шарафли ва муқаддас бурч эканини, миллий армиямиз билан фахрланиш, халқимиз тинчлигига масъуллик туйғуларини чуқур сингдиришдир.
