Mustaqilligimizning 33 yilligi munosabati bilan Milliy gvardiya tizimidagi harbiy xizmatchi va xodimlar o‘rtasida “Eng yaxshi vatanparvarlik ruhidagi videorolik”, “Eng yaxshi vatanparvarlik ruhidagi qo‘shiq” hamda “Vatanni madh etuvchi eng yaxshi sheʼr” tanlovlari o‘tkazildi.
O‘zbekiston Respublikasi Prezidenti, Qurolli Kuchlar Oliy Bosh Qo‘mondoni Sh.Mirziyoyev raisligida 2024-yil 12-yanvar kuni o‘tkazilgan Xavfsizlik kengashining kengaytirilgan yig‘ilishida belgilangan vazifalar ijrosini taʼminlash, harbiy xizmatchilar va xodimlarni vatanparvarlik, ona Vatanga muhabbat va sadoqat ruhida tarbiyalash, ularda milliy va jangovarlik tuyg‘ularini kuchaytirish, maʼnaviy, madaniy va ijodiy salohiyatini yana-da rivojlantirish maqsadida tashkil etilgan ko‘rik-tanlovlarning dastlabkisi Milliy gvardiya Axborot xizmati mediastudiyasida respublikamizdagi markaziy va nodavlat telekanallar, Milliy gvardiya markaziy devoni ofitserilari, faxriylar kengashi raisi hakamligida “Eng yaxshi vatanparvarlik ruhidagi videorolik” tanlovi uchun yuborilgan ijodiy ishlar baholanib, g‘oliblar aniqlandi.
Poytaxtimizdagi Yoshlar ishlari agentligining “Yoshlar press-klubi”da "Vatanni madh etuvchi eng yaxshi sheʼr” tanlovining respublika bosqichi bo‘lib o‘tdi. Unda barcha ishtirokchilar o‘z qalamlariga mansub bo‘lgan vatanparvarlik yo‘nalishidagi ijodiy asarlarini hakamlar hayʼatiga taqdim etdilar. Insoniy fazilatlardan saboq beradigan, vatanni madh etuvchi taʼsirchan sheʼrlarni saralash bosqichi oson kechmadi. Yakuniy natijalarga ko‘ra bir ovozda tan olingan va g‘oliblikka munosib ko‘rilgan ishtirokchilar diplom hamda esdalik sovg‘alari bilan rag‘batlantirildi.
"Eng yaxshi vatanparvarlik ruhidagi qo‘shiq” tanlovi esa Milliy gvardiya Maʼnaviyat va maʼrifat markazida o‘tkazilib, barcha hududiy boshqarmalardan ishtirok etgan harbiy xizmatchi va xodimlar orasidan eng munosiblari Respublika maʼnaviyat va maʼrifat markazi, O‘zbekiston yozuvchilar uyushmasi, shoir va kompozitorlaridan tashkil topgan hakamlar hayʼati tomonidan baholanib, g‘olib deb topildi. Tadbirda so‘z olganlar tomonidan ishtirokchilarning ijodiy asarlari yuqori baholanib, milliy o‘zligimizni anglatishga qaratilgan, Vatanni, mardlik va matonatni madh etuvchi jangovar, saf hamda vatanparvarlik ruhidagi qo‘shiqlar eʼtirof etildi. Tadbir so‘ngida tashkilotchilar tomonidan "Eng yaxshi vatanparvarlik ruhidagi videorolik" va "Eng yaxshi vatanparvarlik ruhidagi qo‘shiq” tanlovlari g‘olib va sovrindorlari munosib ravishda rag‘batlantirildi.
