Мустақиллигимизнинг 33 йиллиги муносабати билан Миллий гвардия тизимидаги ҳарбий хизматчи ва ходимлар ўртасида “Энг яхши ватанпарварлик руҳидаги видеоролик”, “Энг яхши ватанпарварлик руҳидаги қўшиқ” ҳамда “Ватанни мадҳ этувчи энг яхши шеър” танловлари ўтказилди.
Ўзбекистон Республикаси Президенти, Қуролли Кучлар Олий Бош Қўмондони Ш.Мирзиёев раислигида 2024-йил 12-январ куни ўтказилган Хавфсизлик кенгашининг кенгайтирилган йиғилишида белгиланган вазифалар ижросини таъминлаш, ҳарбий хизматчилар ва ходимларни ватанпарварлик, она Ватанга муҳаббат ва садоқат руҳида тарбиялаш, уларда миллий ва жанговарлик туйғуларини кучайтириш, маънавий, маданий ва ижодий салоҳиятини янада ривожлантириш мақсадида ташкил этилган кўрик-танловларнинг дастлабкиси Миллий гвардия Ахборот хизмати медиастудиясида республикамиздаги марказий ва нодавлат телеканаллар, Миллий гвардия марказий девони офицерилари, фахрийлар кенгаши раиси ҳакамлигида “Энг яхши ватанпарварлик руҳидаги видеоролик” танлови учун юборилган ижодий ишлар баҳоланиб, ғолиблар аниқланди.
Пойтахтимиздаги Ёшлар ишлари агентлигининг “Ёшлар пресс-клуби”да "Ватанни мадҳ этувчи энг яхши шеър” танловининг республика босқичи бўлиб ўтди. Унда барча иштирокчилар ўз қаламларига мансуб бўлган ватанпарварлик йўналишидаги ижодий асарларини ҳакамлар ҳайъатига тақдим этдилар. Инсоний фазилатлардан сабоқ берадиган, ватанни мадҳ этувчи таъсирчан шеърларни саралаш босқичи осон кечмади. Якуний натижаларга кўра бир овозда тан олинган ва ғолибликка муносиб кўрилган иштирокчилар диплом ҳамда эсдалик совғалари билан рағбатлантирилди.
"Энг яхши ватанпарварлик руҳидаги қўшиқ” танлови эса Миллий гвардия Маънавият ва маърифат марказида ўтказилиб, барча ҳудудий бошқармалардан иштирок этган ҳарбий хизматчи ва ходимлар орасидан энг муносиблари Республика маънавият ва маърифат маркази, Ўзбекистон ёзувчилар уюшмаси, шоир ва композиторларидан ташкил топган ҳакамлар ҳайъати томонидан баҳоланиб, ғолиб деб топилди. Тадбирда сўз олганлар томонидан иштирокчиларнинг ижодий асарлари юқори баҳоланиб, миллий ўзлигимизни англатишга қаратилган, Ватанни, мардлик ва матонатни мадҳ этувчи жанговар, саф ҳамда ватанпарварлик руҳидаги қўшиқлар эътироф этилди. Тадбир сўнгида ташкилотчилар томонидан "Энг яхши ватанпарварлик руҳидаги видеоролик" ва "Энг яхши ватанпарварлик руҳидаги қўшиқ” танловлари ғолиб ва совриндорлари муносиб равишда рағбатлантирилди.
