MUTAXASSIS-PSIXOLOGLARNING BILIM VA MALAKALARI OSHIRILDI
Milliy gvardiya harbiy qism va muassasalarida mutaxassis-psixolog lavozimida xizmat o‘tayotgan harbiy xizmatchilarni qayta tayyorlash, ularning bilim va malakalarini oshirish maqsadida O‘zbekiston Respublikasi Jamoat xavfsizligi universitetining Kasbiy tayyorgarlik fakultetida “Qayta tayyorlash va malaka oshirish” kurslari tashkil etildi.
Mazkur kurs jarayonida Milliy gvardiya tizimida faoliyat olib borayotgan mutaxassis-psixologlar “yoshlar”, “ayollar” va “temir” daftarlar ro‘yxatiga kiritilgan fuqarolarga psixologik yordam ko‘rsatishning usul va uslublari, uning o‘ziga xos jihatlarini o‘rganishdi.O‘qish jarayonida tinglovchilarga Jamoat xavfsizligi universitetining yetuk professor o‘qituvchilari hamda Ichki ishlar vazirligining mazkur sohada yuqori tajribaga ega bo‘lgan mutaxassislari nazariy va amaliy bilimlar berib borishdi.
O‘qish davomida psixologlar tomonidan Toshkent shahrida tajriba tariqasida o‘rganilayotgan 24 ta mahallalarda fuqarolar bilan profilaktik tushuntirish ishlari olib borilib, ularni qiynab kelayotgan muammolari o‘rganildi.
Shu bilan bir qatorda, Toshkent shahar IIBB qoshidagi Muayyan yashash joyiga ega bo‘lmagan shaxslarni reabilitatsiya qilish markazi va 23-sonli Mehribonlik uylarida amaliyot o‘tab, psixologik yordamga muhtoj bo‘lgan fuqarolarga qanday qilib yordam ko‘rsatishni, joriy etilgan yangi tizimning mazmun-mohiyati va uni amalga oshirish yo‘llarini qunt bilan o‘rganishdi.
O‘quv yakunida kursni muvaffaqiyatli bitirgan mutaxassis-psixologlarga sertifikatlar topshirildi.
