Navoiy viloyatida innоvatsion harbiy dala-o‘quv maydonining ochilish marosimi bo‘lib o‘tdi.
Davlatimiz rahbarining tashabbusi bilan barcha sohalar qatori Qurolli Kuchlar tizimida ham izchil islohotlar olib borilmoqda. Bu esa o‘z navbatida yurtimiz tinchligi va aholimiz osoyishtaligini taʼminlash yo‘lida kuch tuzilmalari zimmasiga yuklatilgan vazifalarni sifatli bajarilishi hamda tayyorgarlik ko‘rishlari uchun keng imkoniyatlar yaratmoqda. Xususan, Milliy gvardiya Navoiy viloyati bo‘yicha boshqarmasi tasarrufida ilk bora hududiy kuch tuzulmalari uchun zamonaviy hamda barcha shart-sharoitlarga ega bo‘lgan dala-o‘quv maydonining barpo etilishi ham mazkur islohotlarning mantiqiy davomidir.
Karmana tumani hududida joylashgan mazkur dala-o‘quv maydonining tantanali ochilish marosimi bo‘lib o‘tdi. Tadbirda viloyat hokimi N.Tursunov, harbiy maʼmuriy sektor rahbari, O‘zbekiston Qahramoni, senator, Navoiy kon-metallurgiya kombinati bosh direktori Q.Sanaqulov, Milliy gvardiya qo‘mondoni o‘rinbosari polkovnik S. Mamayusupov, hamkor vazirliklarning masʼul vakillari, sektor rahbarlari, faxriylar kengashi, keng jamoatchilik va yoshlar ishlari agentligi masʼul xodimlari ishtirok etdi.
Tadbirda so‘zga chiqqanlar tomonidan shu kunga qadar Navoiy garnizoni kuch tuzilmalari amaliy mashg‘ulotlarni Samarqand viloyati Kattaqo‘rg‘on dala-o‘quv poligonida amalga oshirib kelayotganliklari taʼkidlanib, endilikda mazkur dala-o‘quv maydoni barcha bo‘linmalarning nazariy bilim va amaliy ko‘nikmalarini muntazam oshirib, jismoniy va jangovar tayyorgarliklarini mustahkamlashga, shuningdek, mazkur maskan Navoiy yoshlarining vatanparvarlik ruhida kamol topishlariga xizmat qilishiga ishonch bildirishdi.
Shundan so‘ng, mehmonlar dala-o‘quv maydonida bunyod etilgan nazorat o‘tish joyi, maydonning boshqaruv punkti va shtab binosi, yotoqxona, oshxona, o‘quv sinflari, maishiy xizmat ko‘rsatish xonalari, tibbiyot punkti, texnika vositalarining turar joyi, olovli to‘siqlar yo‘lagi, jangovar qurollardan o‘q otish yo‘laklari va maxsus o‘quv mashqlari hududi, temir yo‘l vagoni va avtobuslar maketlari hamda sport shaharchasi bilan yaqindan tanishib chiqishdi.
Shuni alohida eʼtirof etish joizki, shu kunning o‘zida yangi faoliyat boshlagan dala-o‘quv maydonida mahalliy yoshlar va viloyatdagi Milliy gvardiyaga biriktirilgan maktab o‘quvchilari o‘rtasida mini futbol va voleybol sport turlari bo‘yicha musobaqalar tashkil etildi.
Shuningdek, yoshlar uchun harbiy xizmatchilar tomonidan qurol-aslaha va harbiy texnikalar ko‘rgazmasi bo‘lib o‘tdi, unda yoshlar o‘zlarini qiziqtirgan barcha savollariga javob olishdi. Kun yakunida esa dala qo‘ynida gulhan yoqishib, uning atrofida jo‘r bo‘lib, qo‘shiq kuylagan holda maʼdaniy xordiq chiqarishdi.
