Navoiy viloyatida uloq-ko‘pkari musobaqalari o‘tkazildi.
Mamlakatimizda ot sportini rivojlantirish, uning moddiy-texnik bazasini mustahkamlash, chavandozlar maktablarini tashkil etish bo‘yicha keng qamrovli ishlar amalga oshirilmoqda. Shu munosabat bilan, chavandozlari elga tanilgan Navoiy viloyati Navbahor tumani “Yangi kuch” MFY da Navoiy viloyati Milliy gvardiya boshqarmasi hamda Qo‘riqlash boshqarmasi, Uloq-ko‘pkari federatsiyasi bilan hamkorlikda Milliy gvardiya Navoiy viloyati bo‘yicha boshqarmasi boshlig‘i kubogi o‘tkazildi. Ushbu musobaqaga butun respublikamiz bo‘ylab 200 nafarga yaqin epchil va mohir chavandozlar tashrif buyurishib, sovrin uchun kurash olib bordilar. Dastlab homiylar tomonidan qo‘yilgan sovrinlar uchun boshlangan dastlabki kurashlarda polvonlar epchillik bilan harakat qilishib, kuchlilarga sovrinlarni olish nasib etdi. Kubok uchun boshlangan shiddatli va murosasiz bahslarda esa navbahorlik Jo‘rabek polvonning qo‘li baland kelib, boshqarma boshlig‘ining kubogi sohibiga aylandi. Ko‘tarinki ruhda o‘tkazilgan ushbu musobaqada polvonlarimiz ot ustida o‘z mahoratlarini ko‘rsatishlari barcha tomoshabinlarda katta taassurot qoldirdi. Albatta, bu kabi sport o‘yinlari yoshlarni ot sportiga qiziqishini orttirib, sog‘lom avlod bo‘lib yetishishida muhim rol o‘ynaydi.