Навоий вилоятида улоқ-кўпкари мусобақалари ўтказилди.
Мамлакатимизда от спортини ривожлантириш, унинг моддий-техник базасини мустаҳкамлаш, чавандозлар мактабларини ташкил этиш бўйича кенг қамровли ишлар амалга оширилмоқда. Шу муносабат билан, чавандозлари элга танилган Навоий вилояти Навбаҳор тумани “Янги куч” МФЙ да Навоий вилояти Миллий гвардия бошқармаси ҳамда Қўриқлаш бошқармаси, Улоқ-кўпкари федерацияси билан ҳамкорликда Миллий гвардия Навоий вилояти бўйича бошқармаси бошлиғи кубоги ўтказилди. Ушбу мусобақага бутун республикамиз бўйлаб 200 нафарга яқин эпчил ва моҳир чавандозлар ташриф буюришиб, соврин учун кураш олиб бордилар. Дастлаб ҳомийлар томонидан қўйилган совринлар учун бошланган дастлабки курашларда полвонлар эпчиллик билан ҳаракат қилишиб, кучлиларга совринларни олиш насиб этди. Кубок учун бошланган шиддатли ва муросасиз баҳсларда эса навбаҳорлик Жўрабек полвоннинг қўли баланд келиб, бошқарма бошлиғининг кубоги соҳибига айланди. Кўтаринки руҳда ўтказилган ушбу мусобақада полвонларимиз от устида ўз маҳоратларини кўрсатишлари барча томошабинларда катта таассурот қолдирди. Албатта, бу каби спорт ўйинлари ёшларни от спортига қизиқишини орттириб, соғлом авлод бўлиб етишишида муҳим рол ўйнайди.
