YANGI O‘ZBEKISTONDA YANGI BAYRAM
Mamlakatimizda 30 iyul – “Xalqaro do‘stlik kuni” deb belgilandi. Shu munosabat bilan bugun O‘zbekiston Respublikasi Milliy gvardiyasi hamda Respublika maʼnaviyat va maʼrifat markazi hamkorligida “Millatlararo do‘stlik va hamjihatlik – xalqimiz tinchligi va farovonligining muhim omilidir” mavzusida maʼnaviy-maʼrifiy tadbir bo‘lib o‘tdi.
Yoshlar ittifoqi press-klubida bo‘lib o‘tgan mazkur tadbirda tashrif buyurgan millat vakillari hamda rasmiy mehmonlar barchani bayram bilan samimiy muborakbod etishdi.
Shuningdek, yig‘ilganlarga bayram kuniga bag‘ishlangan maxsus videorolik namoyish etildi.
Tadbirning badiiy qismida Jamoat xavfsizligi universiteti ayol harbiy xizmatchilari tomonidan namoyish etilgan koreys milliy raqsi barchaga ko‘tarinki ruh baxsh etdi. Milliy gvardiya Ashula va raqs ansambli raqqosalari tomonidan uyg‘ur va tojik milliy raqslari namoyish etilgan bo‘lsa, “Temuriylar” guruhi tomonidan o‘zbek va gruzin raqslari yig‘ilganlar olqishiga sazovor bo‘ldi.
Tadbir yakunida anjuman mehmonlari va faol ishtirokchilarga esdalik sovg‘alari topshirilib, bu kunni surʼatlar bilan tarix zarvaraqlariga muhrlashdi.
