Nukus shahrida yo‘lovchilarning chaqiruviga binoan yetib borgan Milliy gvardiya xodimlari tomonidan suvda cho‘kayotgan fuqaro qutqarib olindi
Joriy yilning 20 oktyabr kuni soat 16:10 larda Nukus shahar, hududidan oqib o‘tuvchi Do‘stlik kanalida piyodalar o‘tish uchun mo‘ljallangan ko‘prikdan o‘tayotgan fuqaro A.A. suvda cho‘kayotgan qizni ko‘rib qolib ushbu hududga yaqin bo‘lgan Markaziy dehqon bozorida xizmat o‘tayotgan Milliy gvardiya xodimlariga xabar beradi.
Milliy gvardiya xodimlarining tezkor harakati va xabar bergan fuqaroning yordami bilan cho‘kayotgan qiz qutqarib olinib, unga birinchi tez tibbiy yordam ko‘rsatiladi.
Shundan so‘ng chaqiruvga asosan yetib kelgan tez tibbiy yordam orqali mazkur fuqaro Nukus shahridagi Respublika shoshilinch tibbiy markaziga yotqizilgan va hozirda holati yaxshi.
Dastlabki o‘rganishlar natijasida ushbu fuqaro Nukus shahrida yashovchi 18 yoshli G.Q. ekani maʼlum bo‘lgan va hozirda Nukus shahar IIB xodimlari tomonidan surishtiruv ishlari olib borilmoqda.
