JAMOAT TRANSPORTI SOHASIDAGI VAZIYATNI YАXShILASh BO‘YIChA ChORALAR BELGILAB OLINDI
Joriy yilning 13 dekabr kuni davlatimiz rahbari poytaxtimizning Uchtepa tumaniga tashrifi davomida "Toshshahartransxizmat" aksiyadorlik jamiyatiga qarashli 18-avtobus saroyida bo‘lib, jamoat transporti tizimidagi mavjud muammolar va ularni bartaraf etish choralari muhokama qilindi.
Shuningdek, poytaxtimizdagi jamoat transporti sohasini zudlik bilan takomillashtirish chora-tadbirlarini ko‘rish yuzasidan Milliy gvardiya, Ichki ishlar va Favqulodda vaziyatlar vazirliklari oldiga avtobus saroylar va ulardagi jamoat transportlari holatini o‘rganish bo‘yicha vazifalar belgilandi.
Mazkur vazifalar ijrosi yuzasidan 14 dekabr kuni Milliy gvardiya qo‘mondoni general-mayor R.Djurayev raisligida tezkor yig‘ilish o‘tkazildi.
Unda IIV va "Toshshahartransxizmat" aksiyadorlik jamiyati mutasaddi rahbarlari, Respublika Favqulodda vaziyatlar vazirligi va Yo‘l harakati xavfsizligi bosh boshqarmasi rahbarlari, shuningdek soxaga oid tizim vakillari ishtirok etishdi.
Yig‘ilishda davlatimiz rahbari tomonidan belgilab berilgan vazifalar yodga olinib, asosiy kamchiliklardan biri bo‘lgan yo‘lovchilarning ehtiyojlarini qondirish uchun avtobuslar yetishmasligi, jamoat transporti ustuvorligiga rioya etilmasligi va harakatlanish oralig‘i uzoqligi hamda buning oqibatlari to‘g‘risida fikr yuritildi.
Toshkent shahrining Yashnobod (1-2 sonli) va M.Ulug‘bek (5-sonli) tumanlaridagi 1, 2 va 5-sonli avtobus saroylari Milliy gvardiyaga biriktirilganligi hamda mas’ul xodimlar tomonidan ushbu yo‘nalishlardagi holat chuqur o‘rganilishi va ma’lumot kiritilishi ta’kidlandi.
Milliy gvardiya qo‘mondoni tomonidan Jamoat transporti sohasini takomillashtirish bo‘yicha mas’ul vazirliklarning hamkorlik masalalari va alohida yo‘nalishlardagi amalga oshiriladigan ishlari bo‘yicha aniq topshiriqlar berildi.
Shu bilan bir qatorda Milliy gvardiya, FVV va Ichki ishlar organi Yo‘l harakati xavfsizligi xodimlari hamda "Toshshahartransxizmat" vakillaridan iborat tuzilgan ishchi guruhlar belgilangan muddatlarda mavjud muammolarni o‘rganib, ularni qisqa muddatlarda bartaraf etish yuzasidan chora-tadbirlar belgilab olindi.
Ishchi guruhlarga berilgan topshiriqlarning bajarilishi ustidan kunlik nazorat Milliy gvardiya qo‘mondonligi tomonidan amalga oshirilishi qat’iy ta’kidlandi.
