Жорий йилнинг 13 декабрь куни давлатимиз раҳбари пойтахтимизнинг Учтепа туманига ташрифи давомида   "Тошшаҳартрансхизмат" акциядорлик жамиятига қарашли 18-автобус саройида бўлиб, жамоат транспорти тизимидаги мавжуд муаммолар ва уларни бартараф этиш чоралари муҳокама қилинди.

Шунингдек, пойтахтимиздаги жамоат транспорти соҳасини зудлик билан такомиллаштириш чора-тадбирларини кўриш юзасидан Миллий гвардия, Ички ишлар ва Фавқулодда вазиятлар вазирликлари олдига  автобус саройлар ва улардаги жамоат транспортлари ҳолатини ўрганиш бўйича вазифалар белгиланди. 

Мазкур вазифалар ижроси юзасидан 14 декабрь куни Миллий гвардия қўмондони генерал-майор Р.Джураев раислигида тезкор йиғилиш ўтказилди.

Унда ИИВ ва "Тошшаҳартрансхизмат" акциядорлик жамияти мутасадди раҳбарлари, Республика Фавқулодда вазиятлар вазирлиги ва Йўл ҳаракати хавфсизлиги бош бошқармаси раҳбарлари, шунингдек сохага оид тизим вакиллари иштирок этишди.

Йиғилишда давлатимиз раҳбари томонидан белгилаб берилган вазифалар ёдга олиниб, асосий камчиликлардан бири бўлган йўловчиларнинг эҳтиёжларини қондириш учун автобуслар етишмаслиги, жамоат транспорти устуворлигига риоя этилмаслиги ва ҳаракатланиш оралиғи узоқлиги  ҳамда бунинг оқибатлари тўғрисида фикр юритилди.

Тошкент шаҳрининг Яшнобод (1-2 сонли) ва М.Улуғбек (5-сонли) туманларидаги 1, 2 ва 5-сонли автобус саройлари Миллий гвардияга бириктирилганлиги ҳамда масъул ходимлар томонидан ушбу йўналишлардаги ҳолат чуқур ўрганилиши ва маълумот киритилиши таъкидланди.  

Миллий гвардия қўмондони томонидан Жамоат транспорти соҳасини такомиллаштириш бўйича масъул вазирликларнинг ҳамкорлик масалалари ва алоҳида йўналишлардаги амалга ошириладиган ишлари бўйича аниқ топшириқлар берилди.

Шу билан бир қаторда Миллий гвардия, ФВВ ва Ички ишлар органи Йўл ҳаракати хавфсизлиги ходимлари ҳамда "Тошшаҳартрансхизмат" вакилларидан иборат тузилган ишчи гуруҳлар белгиланган муддатларда мавжуд муаммоларни ўрганиб, уларни қисқа муддатларда бартараф этиш юзасидан  чора-тадбирлар  белгилаб олинди.

Ишчи гуруҳларга берилган топшириқларнинг бажарилиши устидан кунлик назорат Миллий гвардия қўмондонлиги томонидан амалга оширилиши  қатъий таъкидланди.