Ofitserlik kurslarini tamomlagan Milliy gvardiya inspektor-psixologlariga tantanali ravishda dastlabki “Leytenant” unvoni topshirildi
Bugungi kunda respublikadagi 10 mingga yaqin maktablarda 2000 ta Milliy gvardiya inspektor-psixologlari faoliyat yuritmoqda. Ularning “Maktab – ota-ona – mahalla” zanjiri asosida ishlarini samarali tashkil etishlarini rivojlantirish maqsadida muntazam ravishda malakalari oshirilib kelinmoqda. Ana shunday 400 ga yaqin harbiy xizmatchilar Milliy gvardiya Jamoat xavfsizligi universiteti ofitserlar tayyorlash kurslarida o‘qitilib, bitiruvchilarga dastlabki leytenant unvoni Milliy gvardiya hududiy boshqarmalarida tantanali ravishda topshirildi.
Milliy gvardiya Toshkent shahari bo‘yicha boshqarmasida o‘tkazilgan tantanali marosimda Milliy gvardiya qo‘mondoni o‘rinbosari polkovnik S.Mamayusupov ishtirok etib, yosh inspektor-psixologlarni dastlabki ofitserlik unvonini olganligi bilan tabrikladi va kelgusi xizmatlariga muvaffaqiyat tiladi. Shuningdek tadbirda Toshkent shahar maktabgacha va maktab taʼlimi boshqarmasi mutasaddi vakillari, faxriylar, ota-onalar, harbiy xizmatchilar ishtirok etishdi.
Shundan so‘ng, safda qad rostlab turgan bitiruvchilarga keng jamoatchilik oldida sertifikatlar hamda harbiy unvonlar tantanali ravishda topshirildi.
Endilikda ofitser unvonini qabul qilib olgan inspektor-psixologlar boshqa vazirlik va idoralar bilan hamkorlikda o‘quvchilarning bo‘sh vaqtlarini mazmunli o‘tkazish, kasbga yo‘naltirish, tarbiyalash bo‘yicha ota-onalar, mahalla faollari bilan hamkorlikda ishlashni yana-da jadallashtiradi. Mahalla yettiligi va faollari bilan birgalikda tarbiyasi va o‘qishida muammo bo‘lgan o‘quvchilarning ota-onalari bilan shug‘ullanib, ularning yechimi bo‘yicha aniq choralar ko‘rishadi.
