Офицерлик курсларини тамомлаган Миллий гвардия инспектор-психологларига тантанали равишда дастлабки “Лейтенант” унвони топширилди
Бугунги кунда республикадаги 10 мингга яқин мактабларда 2000 та Миллий гвардия инспектор-психологлари фаолият юритмоқда. Уларнинг “Мактаб – ота-она – маҳалла” занжири асосида ишларини самарали ташкил этишларини ривожлантириш мақсадида мунтазам равишда малакалари оширилиб келинмоқда. Ана шундай 400 га яқин ҳарбий хизматчилар Миллий гвардия Жамоат хавфсизлиги университети офицерлар тайёрлаш курсларида ўқитилиб, битирувчиларга дастлабки лейтенант унвони Миллий гвардия ҳудудий бошқармаларида тантанали равишда топширилди.
Миллий гвардия Тошкент шаҳари бўйича бошқармасида ўтказилган тантанали маросимда Миллий гвардия қўмондони ўринбосари полковник С.Мамаюсупов иштирок этиб, ёш инспектор-психологларни дастлабки офицерлик унвонини олганлиги билан табриклади ва келгуси хизматларига муваффақият тилади. Шунингдек тадбирда Тошкент шаҳар мактабгача ва мактаб таълими бошқармаси мутасадди вакиллари, фахрийлар, ота-оналар, ҳарбий хизматчилар иштирок этишди.
Шундан сўнг, сафда қад ростлаб турган битирувчиларга кенг жамоатчилик олдида сертификатлар ҳамда ҳарбий унвонлар тантанали равишда топширилди.
Эндиликда офицер унвонини қабул қилиб олган инспектор-психологлар бошқа вазирлик ва идоралар билан ҳамкорликда ўқувчиларнинг бўш вақтларини мазмунли ўтказиш, касбга йўналтириш, тарбиялаш бўйича ота-оналар, маҳалла фаоллари билан ҳамкорликда ишлашни янада жадаллаштиради. Маҳалла еттилиги ва фаоллари билан биргаликда тарбияси ва ўқишида муаммо бўлган ўқувчиларнинг ота-оналари билан шуғулланиб, уларнинг ечими бўйича аниқ чоралар кўришади.
