“G‘ofur G‘ulom” nomli istirohat bog‘ida teatrlashtirilgan shou konserti bo‘lib o‘tdi
Musiqa bolalar va yoshlarni Vatanparvarlik ruhida tarbiyalashning g‘oyat taʼsirchan va samarali vositasi sifatida ham ahamiyatga ega bo‘lib, bugungi kunda aholi, ayniqsa, olis hududlarda istiqomat qiladigan fuqarolarga madaniy dam olish xizmatlari ko‘rsatish darajasini oshirish, respublikaning barcha hududlarida teatr, sirk va boshqa turdagi ommaviy-madaniy va konsert-tomosha tadbirlarini tizimli ravishda yo‘lga qo‘yish, madaniyat va sanʼat sohasida isteʼdodli yosh ijodkorlarni izlab topish va qo‘llab-quvvatlash, ularning intellektual va ijodiy salohiyatini yana-da rivojlantirish borasidagi islohotlar izchil davom ettirilmoqda.
Jumladan, bugun poytaxtimizning Chilonzor tumanida joylashgan “G‘ofur G‘ulom” nomli istirohat bog‘ida Milliy gvardiya Harbiy musiqa akademik litseyi tomonidan Toshkent shahar yoshlari va poytaxtimiz mehmonlari, shuningdek Milliy gvardiya tizimidagi harbiy xizmatchi va xodimlarning oila aʼzolari uchun teatrlashtirilgan shou konsert dasturi namoyish etildi.
Ochiq osmon ostida o‘tgan shou konsertda litseyning professional o‘quvchilari milliy va yevropa madaniyatiga hos cholg‘ularda klassik va zamonaviy musiqa, jaz, rok hamda pop musiqa sadolari ostidagi ko‘rgazmali chiqishlari bilan shahar yoshlari hamda poytaxtimiz mehmonlariga ko‘tarinki kayfiyat ulashishdi.
