Respublikamiz bo‘ylab yong‘in xavfsizligiga bag‘ishlangan profilaktik tadbirlar davom etmoqda
Bugungi kunda respublikamiz bo‘ylab shahar va viloyatlar markazlaridagi yirik bozorlar, istirohat bog‘lari va xiyobonlarda jamoat tartibini saqlash, yong‘in va boshqa favqulodda vaziyatlarning oldini olish samaradorligini oshirish maqsadida, hamkorlikdagi chora-tadbirlar kuchaytirilgan.
Xususan, Farg‘ona viloyatida Milliy gvardiyaning javobgarlik hududi bo‘lgan Markaziy dehqon bozori hamda buyum bozorlarida FVV bilan hamkorlikda kuz qish mavsumiga tayyorgarlik ishlari olib borilmoqda.
Javobgarlik hududlarida yong‘in xavfsizligi yo‘laklari, zaxira suv quduqlari sozligi tekshirilib, sotuv rastalari bilan to‘sib qo‘yilgan yo‘laklarni ochish choralari ko‘rilib, tadbirkorlar bilan profilaktik tushuntirish ishlari olib borilmoqda.
Shuningdek, yong‘in sodir bo‘lganda sotuvchi va xaridorlarni xavfsiz evakuatsiya qilish, yong‘inlarni o‘z vaqtida o‘chirish hamda yong‘inga qarshi himoya vositalarining mavjudligi mutaxassislar tomonidan o‘rganilib bozor maʼmuriyati bilan qator masalalar yechimi yuzasidan vazifalar belgilab olindi.
