Oliy o‘quv yurtlariga kirish imkonini beruvchi tavsiyanomalar uchun muddatli harbiy xizmatchilar test sinovlaridan o‘tkazilmoqda
Test sinovlari davomida muddatli harbiy xizmatchilar tomonidan jangovar va maʼnaviy-maʼrifiy tayyorgarlik dasturlarining qanchalik o‘zlashtirganligi yakuniy baholandi va ularning bilim darajasi tekshirildi. Milliy gvardiya saflarida harbiy xizmatni ado etayotgan yigitlar test jarayonlarini tashkil etish va o‘tkazishga masʼul idoralar hamda tashkilotlar masʼullari nazorati ostida xizmat davomida olgan bilimlarini sinovdan o‘tkazishdi. Jarayonni o‘tkazishda haqqoniylik va shaffoflikni taʼminlashga ham alohida eʼtibor qaratildi. Mazkur test sinovlari Respublika bo‘ylab Milliy gvardiya harbiy qismlarida o‘tkazilmoqda.
Maʼlumot o‘rnida: Test topshiriqlarining umumiy soni 100 ta test savollaridan iborat. Shundan 40 ta savol jangovar tayyorgarlik bo‘yicha, 20 tasi maʼnaviy-maʼrifiy tayyorgarlik bo‘yicha, 10 tasi matematika fanidan, 10 tasi fizika fanidan va 20 tasi mantiqiy savollardir. Test sinovlarida ishtirok etib, to‘plash mumkin bo‘lgan eng yuqori ko‘rsatkich 110 ballni tashkil qiladi.
Harbiy xizmatni o‘tagan fuqarolarga beriladigan tavsiyanomalar 3 yil mobaynida amal qiladi.
