OROMGOHLARDA OMMAVIY SPORT MUSOBAQASI O‘TKAZILDI
Mamlakatimizda ayni kunlarda 5 ta muhim tashabbusning ikkinchi yo‘nalishi bo‘yicha o‘quvchi-yoshlar o‘rtasida sog‘lom turmush tarzi hamda jismoniy tarbiya va sportni keng targ‘ib qilish borasida samarali ishlar amalga oshirilmoqda.
Xususan, O‘zbekiston Respublikasi Milliy gvardiyasi “Dinamo” JTSJ Qashqadaryo viloyati kengashi tomonidan Kitob tumanida joylashgan “Nurafshon”, “Aloqachi”, “Yosh alangachi” oromgohlarida yozgi taʼtillarni o‘tkazayotgan maktab o‘quvchilari o‘rtasida sportning shaxmat-shashka, badiiy gimnastika, quvnoq startlar, yengil atletika, mini futbol hamda “work out” turlari bo‘yicha sport musobaqalari o‘tkazildi.
Musobaqa yakunida ilg‘orligini namoyon etib, g‘oliblikni qo‘lga kiritgan yoshlar tashkilotchilar tomonidan esdalik sovg‘alari bilan taqdirlandi.
Bir so‘z bilan aytganda, bunday tadbirlar davomiyligi bolalar taʼtilni sermazmun o‘tkazishlari va isteʼdodlarini namoyon qilishlari, sport yoki sanʼat turlarida o‘zlarini sinab ko‘rishlari uchun keng imkoniyat yaratib bermoqda. Bu esa yoshlarni ko‘p qirrali shaxs sifatida shakllantirib, o‘ziga ishonchi va irodasini oshirishiga xizmat qilmoqda.
