Termiz tumanidagi Milliy gvardiya huzuridagi Qorabayir otlari mahorat maktabi hududida milliy ot sporti o‘yinlarining viloyat saralash bosqichi bo‘lib o‘tdi. "Surxondaryo viloyati Qorabayir zotli otlari" shiori ostida tashkil etilgan mardlar o‘yinida, voha tumanlarida o‘tkazilgan musobaqalarda g‘olib va sovrindor bo‘lgan 200 nafardan ortiq chavandozlar ishtirok etdilar. Unda chobog‘onlar, “ot poygasi”, “jamoaviy ko‘pkari” hamda “olomon uloq-ko‘pkari” bahslarida bellashdilar. Otlar poygasida Milliy gvardiya harbiy xizmatchisi Abdurashid Vorisov “Bars” laqabli Qorabayir oti bilan 1-o‘rinni qo‘lga kiritdi. Milliy gvardiya huzuridagi Qorabayir otlari mahorat maktabi xodimi Samandar Norboyev esa “Bo‘roncha” laqabli oti bilan poygada 2-o‘rinni qo‘lga kiritdi. Shuningdek, jamoaviy ko‘pkari bahslarida Milliy gvardiya chavandozlaridan iborat jamoa barcha mahalliy jamoalardan ustun kelib, g‘oliblikni qo‘lga kiritdi. Qizg‘in bellashuvlarga boy bo‘lgan olomon ko‘pkarida uloq ayirgan chapdast chavondozlar tashkilotchilar tomonidan qo‘yilgan turli qimmatbaho sovrinlar hamda pul mukofoti bilan rag‘batlantirildi.

Shuningdek, tadbir doirasida vohalik yoshlar ishtirokida arqon tortish, kamondan otish, tosh ko‘tarish kabi milliy o‘yinlar ham tashkil etildi. Viloyat saralash bosqichida epchillik va qatiyatlilik mahoratini namoyish etib, g‘olib bo‘lgan eng kuchli chavondozlar, joriy yilning 17 dekabr kuni Samarqand viloyatida o‘tkaziladigan respublika chempionatida ishtirok etish huquqini qo‘lga kiritdilar.