OT SPORTIGA EʼTIBOR
Yurtboshimizning yilqichilik va ot sportini rivojlantirish hamda zamonaviy beshkurash va polo sport turini ommalashtirishga alohida eʼtibor qaratayotganliklari ushbu yo‘nalishdagi ishlar samaradorligini kuchaytirdi.
Respublikamiz bo‘ylab yosh avlodni ushbu sport turiga bo‘lgan qiziqishlarini yana-da orttirishga qaratilgan chora tadbirlar Milliy gvardiya bo‘linmalari tomonidan tizimli yo‘lga qo‘yilgan. Xususan, Andijon viloyatida ham bu boradagi ishlar kun sayin o‘zining ijobiy natijasini bermoqda. Andijon tumanida joylashgan “KING HOUSE” ot sporti maktabida “Yoshlar birlashaylik” shiori ostida o‘tkazilgan uyushmagan yoshlar ishtirokidagi tadbir fikrimiz dalilidir.
Mazkur tadbirda barcha ishtirokchilar ot sporti turlari, uchqur tulporlar xislatlari to‘g‘risidagi maʼlumotlarni mutaxassislar orqali bilib oldilar.
Tadbirga tashrif buyurgan Milliy gvardiya qo‘mondonligi va IIV mutasaddi rahbarlarining yoshlar bilan uchrashib ochiq muloqotda bo‘lganliklari barchada katta taassurot qoldirdi.
Shuningdek, Milliy gvardiya hududiy boshqarmasida ot sporti seksiyalari tashkil qilinganligi va yoshlarning muntazam ravishda ushbu sport turi bilan shug‘ullanishlari uchun taklif qilinganligi ishtirokchi yoshlarda motivatsiya uyg‘otdi desak mubolag‘a bo‘lmaydi.
