OT SPORTIGA DOIR AMALIY TADBIRLAR O‘TKAZILDI
Milliy gvardiya Navoiy viloyati bo‘yicha boshqarmasi tomonidan bolajonlarning yozgi taʼtillarini mazmunli tashkil etish, ularning sog‘lom turmush tarzi va sport mashg‘ulotlariga qiziqishlarini yana-da oshirish maqsadida o‘quv muassasalari hamda oromgohlarda bir qator sport seksiyalari tashkillashtirilmoqda. Jumladan, ot sport seksiyasi faoliyatining yo‘lga qo‘yilishi ham barchada birdek katta qiziqish uyg‘otdi.
Karmana, Navbahor tumanlarida harbiy xizmatchilar tomonidan ochiq osmon ostida o‘tkazilgan ot sporti bo‘yicha ko‘rgazmali mashg‘ulotlarda yoshlarga tulporga minish, erkin harakatlanish, mazkur jonivorlarning zotlari, ularni parvarish qilish, emlash tartibi hamda kunlik ratsioni haqida nazariy va amaliy maʼlumotlar berildi. Shuningdek, otda to‘siqlar osha sakrash, bunda xavfsizlik qoidalarini yodda tutish tushuntirildi. Ushbu tadbirlar jarayonlarida yigit-qizlar yangiliklar bilan yaqindan tanishishdi.
O‘z navbatida, yoshlar tarixda va bugungi kunda otlar tinchlikni saqlash, harbiy maqsadlarda ham insonlarning sadoqatli ko‘makchisi ekanligini bilib olishdi.
Yoshlarni sportga bo‘lgan qiziqishini oshirish yo‘lida amalga oshirilayotgan bu kabi ishlar, ularning kelgusida ruhan sog‘lom va barkamol farzand bo‘lib yetishishiga xizmat qiladi.
