O‘zbek jang sanʼati sport turi bo‘yicha yoshlar, o‘smirlar va kattalar o‘rtasida o‘tkazilayotgan "Milliy gvardiya qo‘mondonining kubogi" musobaqasining viloyat bosqichi o‘tkazilib, respublika bosqichiga saralanmoqda.
Davlatimiz rahbarining "Sog‘lom turmush tarzini keng tatbiq etish va ommaviy sportni yana-da rivojlantirish chora-tadbirlari to‘g‘risida"gi Farmoni, "Etnosport turlarini ommalashtirish va rivojlantirish chora-tadbirlari to‘g‘risida"gi hamda "Paralimpiyachilarning matonat maktabi faoliyatini tashkil etish chora-tadbirlari to‘g‘risida" qarorlari yuzasidan yoshlar o‘rtasida, ayniqsa, imkoniyati cheklangan va nogironligi bo‘lgan yosh avlodni paralimpiya sport turlariga keng jalb etish maqsadida o‘zbek jang sanʼati sport turining “Matonat” yo‘nalishi bo‘yicha yoshlar, o‘smirlar va kattalar o‘rtasida "Milliy gvardiya qo‘mondonining kubogi" musobaqasi tashkil etildi.
Milliy gvardiya, hududiy sportni rivojlantirish boshqarmalari, Xalq taʼlimi boshqarmasi, O‘zbek jang sanʼati federatsiyasi, Yoshlar ishlar agentligi hamkorligidagi mazkur musobaqa nayza uloqtirish, kamondan o‘q uzish, yadro uloqtirish hamda nogironlik aravachasida poyga yo‘nalishlari bo‘yicha o‘tkazildi.
Bellashuv mobaynida ayol va erkak sportchilar o‘z imkoniyatlarini yana bir bor sinovdan o‘tkazib, yuqori natijalarni qo‘lga kiritishdi.
Mazkur musobaqaning hududiy va viloyat bosqichlarida faol qatnashib, g‘oliblikni qo‘lga kiritayotgan sportchilarga tashkilotchilar tomonidan diplom, medal hamda esdalik sovg‘alari topshirilmoqda.
Eslatib o‘tamiz, "Milliy gvardiya qo‘mondonining kubogi" musobaqasining viloyat bosqichlari davom etib, sportchilar hozirgi kunda joriy yilning 4-5 noyabr kunlari poytaxtimizda o‘tkazilishi rejalashtirilgan respublika bosqichiga saralanmoqda.
