Ўзбек жанг санъати спорт тури бўйича ёшлар, ўсмирлар ва катталар ўртасида ўтказилаётган "Миллий гвардия қўмондонининг кубоги" мусобақасининг вилоят босқичи ўтказилиб, республика босқичига сараланмоқда.
Давлатимиз раҳбарининг "Соғлом турмуш тарзини кенг татбиқ этиш ва оммавий спортни янада ривожлантириш чора-тадбирлари тўғрисида"ги Фармони, "Этноспорт турларини оммалаштириш ва ривожлантириш чора-тадбирлари тўғрисида"ги ҳамда "Паралимпиячиларнинг матонат мактаби фаолиятини ташкил этиш чора-тадбирлари тўғрисида" қарорлари юзасидан ёшлар ўртасида, айниқса, имконияти чекланган ва ногиронлиги бўлган ёш авлодни паралимпия спорт турларига кенг жалб этиш мақсадида ўзбек жанг санъати спорт турининг "Матонат" йўналиши бўйича ёшлар, ўсмирлар ва катталар ўртасида "Миллий гвардия қўмондонининг кубоги" мусобақаси ташкил этилди.
Миллий гвардия, ҳудудий спортни ривожлантириш бошқармалари, Халқ таълими бошқармаси, Ўзбек жанг санъати федерацияси, Ёшлар ишлар агентлиги ҳамкорлигидаги мазкур мусобақа найза улоқтириш, камондан ўқ узиш, ядро улоқтириш ҳамда ногиронлик аравачасида пойга йўналишлари бўйича ўтказилди.
Беллашув мобайнида аёл ва эркак спортчилар ўз имкониятларини яна бир бор синовдан ўтказиб, юқори натижаларни қўлга киритишди.
Мазкур мусобақанинг ҳудудий ва вилоят босқичларида фаол қатнашиб, ғолибликни қўлга киритаётган спортчиларга ташкилотчилар томонидан диплом, медаль ҳамда эсдалик совғалари топширилмоқда.
Эслатиб ўтамиз, "Миллий гвардия қўмондонининг кубоги" мусобақасининг вилоят босқичлари давом этиб, спортчилар ҳозирги кунда жорий йилнинг 4-5 ноябрь кунлари пойтахтимизда ўтказилиши режалаштирилган республика босқичига сараланмоқда.
