O‘zbekiston Respublikasi mustaqilligining 33 yilligi munosabati bilan Milliy gvardiya harbiy xizmatchilari va xodimlari uchun tashkillashtirilgan bayramona tadbirda davlat mukofotlari o‘z egalariga topshirildi
Davlatimiz rahbarining “O‘zbekiston Respublikasi davlat mustaqilligining o‘ttiz uch yilligi munosabati bilan harbiy xizmatchilar va huquqni muhofaza qilish organlari xodimlaridan bir guruhini mukofotlash to‘g‘risida"gi Farmoni bilan Milliy gvardiya harbiy xizmatchi va xodimlarining ham bir guruhi mukofotlandi.
Shu munosabat bilan bo‘lib o‘tgan tantanali tadbirda Milliy gvardiya qo‘mondoni general-mayor R.Djurayev ishtirok etib, tizimdagi barcha shaxsiy tarkibni mustaqilligimizning 33 yilligi bilan samimiy muborakbod etdi va davlatimizning yuksak mukofotlariga sazovor bo‘lgan 7 nafar harbiy xizmatchi va xodimlarimizni davlat mukofotlari, yaʼni “Sog‘lom turmush”, “Jasorat”, “Sodiq xizmatlari uchun” va “Shuhrat” medallarini topshirdi.
“Shuhrat” medali sohibi bo‘lgan 65921 harbiy qism mutaxassis mergani serjant Mamatov G‘ayratjon To‘xtamurodovichga davlat mukofoti shaxsan Muhtaram Prezidentimiz tomonidan topshirilishi Milliy gvardiya tizimiga bo‘lgan alohida eʼtibor ifodasi ekanligi taʼkidlandi.
Shuningdek, Eng ulug‘, eng aziz bayram Mustaqillik kuni munosabati bilan Milliy gvardiya qo‘mondoni buyrug‘iga asosan xizmatda yuqori natijalarga erishgan 3 nafar harbiy xizmatchi va xodimlarga navbatdagi “polkovnik” harbiy hamda maxsus unvoni, 200 nafariga “Aʼlo xizmatlari uchun”, “Milliy gvardiya fidoyi xodimi”, “Maʼnaviyat aʼlochisi”, “Namunali xizmatlari uchun”, “Milliy gvardiya faxriysi” ko‘krak nishonlari, 2 ta Mudofaa vazirligi esdalik xanjari, 100 nafariga faxriy yorliq hamda 180 nafariga esdalik sovg‘alari topshirildi.
Mazkur bayram munosabati bilan tizimda faoliyat yuritib kelayotgan 480 nafar harbiy xizmatchi va xodimlar hamda faxriylar va ishchi-xizmatchilarning munosib taqdirlanganligi, ularning keyingi xizmat davomidagi shijoatini oshirishga xizmat qiladi desak mubolag‘a bo‘lmaydi.
Fursatdan foydalanib barcha yurtdoshlarimizni mustaqilligimizning 33 yilligi bilan samimiy muborakbod etamiz. Yurtimiz tinch, osmonimiz musaffo bo‘lsin!
