Ўзбекистон Республикаси мустақиллигининг 33 йиллиги муносабати билан Миллий гвардия ҳарбий хизматчилари ва ходимлари учун ташкиллаштирилган байрамона тадбирда давлат мукофотлари ўз эгаларига топширилди
Давлатимиз раҳбарининг “Ўзбекистон Республикаси давлат мустақиллигининг ўттиз уч йиллиги муносабати билан ҳарбий хизматчилар ва ҳуқуқни муҳофаза қилиш органлари ходимларидан бир гуруҳини мукофотлаш тўғрисида"ги Фармони билан Миллий гвардия ҳарбий хизматчи ва ходимларининг ҳам бир гуруҳи мукофотланди.
Шу муносабат билан бўлиб ўтган тантанали тадбирда Миллий гвардия қўмондони генерал-майор Р.Джураев иштирок этиб, тизимдаги барча шахсий таркибни мустақиллигимизнинг 33 йиллиги билан самимий муборакбод этди ва давлатимизнинг юксак мукофотларига сазовор бўлган 7 нафар ҳарбий хизматчи ва ходимларимизни давлат мукофотлари, яъни “Соғлом турмуш”, “Жасорат”, “Содиқ хизматлари учун” ва “Шуҳрат” медалларини топширди.
“Шуҳрат” медали соҳиби бўлган 65921 ҳарбий қисм мутахассис мергани сержант Маматов Ғайратжон Тўхтамуродовичга давлат мукофоти шахсан Муҳтарам Президентимиз томонидан топширилиши Миллий гвардия тизимига бўлган алоҳида эътибор ифодаси эканлиги таъкидланди.
Шунингдек, Энг улуғ, энг азиз байрам Мустақиллик куни муносабати билан Миллий гвардия қўмондони буйруғига асосан хизматда юқори натижаларга эришган 3 нафар ҳарбий хизматчи ва ходимларга навбатдаги “полковник” ҳарбий ҳамда махсус унвони, 200 нафарига “Аъло хизматлари учун”, “Миллий гвардия фидойи ходими”, “Маънавият аълочиси”, “Намунали хизматлари учун”, “Миллий гвардия фахрийси” кўкрак нишонлари, 2 та Мудофаа вазирлиги эсдалик ханжари, 100 нафарига фахрий ёрлиқ ҳамда 180 нафарига эсдалик совғалари топширилди.
Мазкур байрам муносабати билан тизимда фаолият юритиб келаётган 480 нафар ҳарбий хизматчи ва ходимлар ҳамда фахрийлар ва ишчи-хизматчиларнинг муносиб тақдирланганлиги, уларнинг кейинги хизмат давомидаги шижоатини оширишга хизмат қилади десак муболаға бўлмайди.
Фурсатдан фойдаланиб барча юртдошларимизни мустақиллигимизнинг 33 йиллиги билан самимий муборакбод этамиз. Юртимиз тинч, осмонимиз мусаффо бўлсин!
